Марий Элыште школышто тунемше-влаклан «Калейдоскоп открытий» научный да тӱвыра проект умбакыже илышыш пурталтеш.
Эртыше шуматкечын тудын кышкарыштыже эртыше мероприятий Йошкар-Ола, Волжск, Козьмодемьянск олаласе, тыгак Оршанке, Юрино районлаште верланыше общеобразовательный организацийлаште тунемше-влаклан лийын. Йоча-шамычлан «Учёный дене унаште» проект дене келшышын Марий кугыжаныш университетыште, Юл кундем технологий университетыште, Йошкар-Оласе строительный да технологий техникумлаште экскурсийым эртареныт. Кажныштыже мастер-классым, интерактивный модышым эртареныт, научный лабораторийлам ончыктеныт. Тыгак нунылан ик эн ончыл учёныйна-влакын лекцийыштым колышташ йӧн лийын.
Ушештарена, тиде проект республикыштына кокымшо ий шыҥдаралтеш. Тудым Марий Эл Образований да науко министерстве Икымше-влакын толкынышт дене пырля эртара.
Г.Кожевникова
Фотом Марий Эл Образований да науко министерствын сайтше гыч налме
