Марий Элым вуйлатыше «1941-1945 ийласе Кугу Отечественный сарыште сеҥымылан – 80 ий» икымше юбилейный медальым Провой кундемыште илыше тылын труженикшылан кучыктен.
Юрий Зайцев Звенигово районышко паша дене мийымыж годым Кугу Отечественный сар пагытыште тылыште пашам ыштыше 102 ияш Зинаида Васильевна Соколова деке пурен.
Сар тӱҥалмеке, 19 ияш Зинаида Соколова Подольскысо патрон заводыш пашам ышташ каен. Икмыняр жап гыч заводым Барнаулыш эвакуироватленыт, да ӱдыр шке ялышкыже пӧртылын. Ораван тракторым виктарен, тӱшка озанлыкын пасуштыжо тыршен, чодырам йӧрыкташ коштын. Шужен ийжым, моло азапшым калык дене иктӧр чытен. Сар пытымеке, Зинаида Васильевна Красногорский посёлкышто почмо йолчиемлан колодкым ыштыме фабрикыште станочницылан ышташ тӱҥалын. 1960 ий гыч Красногорский автофургон заводышто тыршен, тышечынак сулен налме канышыш лектын.
Зинаида Васильевналан кызыт – 102 ий. Тынар кужун илыме секретлан тудо поро да весела кумылым, пашам йӧратымым, вашмутланымым шотла.
Республикым вуйлатыше тылыште пашам ыштыше ӱдырамаш дене илыш нерген мутланен.
– Тыланда элнам вуйлатышын лӱмжӧ дене Кугу Отечественный сарыште сеҥымылан 80 ий теммылан пӧлеклалтше медальым кучыктынем. Тиде тендан – лӱддымылыкым да шкем чаманыде тыршымым ончыктышо айдемын – сулен налме наградыда, – икымше юбилейный медальым кучыктымыж годым манын Юрий Зайцев.
Зинаида Васильевна шуко чытыш да сеҥымаш дене темше кужу илыш корным эртен. Лач тудын гай пример дене эрык верч кредалше-влакын лӱддымӧ да герой лиймышт нерген шарнымаш аралалт кодын, палемден Марий Элым вуйлатыше.
Марий Элым вуйлатышын пресс-службыжын уверже негызеш Маргарита ИВАНОВА ямдылен