КУЧЕМЫШТЕ

Жап деч ончыч чоҥен шуктат

Волжскышто аварийный пӧртлаште илыше-влаклан у пӧртым палемдыме жап деч ончыч чоҥен шуктат.

Тидыже Марий Элым вуйлатышын пашажым жаплан шуктышо Юрий Зайцевын Волжскышко паша дене миен коштмыж годым рашемын.

Аварийный да шӱкшемше илыме фондла гыч кусарыме программе дене тыште 70 пачерым налме, эше 24 ойпидышым тулык да ача-ава ончымо деч посна кодшо йоча-влаклан ситараш ыштыме.

Пӧртым тений идалык мучаш марте чоҥен пытараш палемдыме улмаш, но подрядчикын ӱшандарымыж почеш, объект уже 90 процентлан ямде, сандене тудым шыжымак сдатлат.

«Молодец улыда. Пашам жапым ончылтен шуктеда, но чылажымат сайын ышташ кӱлеш – тиде тӱҥ, да кумдыкым тӱзатыме нерген ида мондо», – палемден Ю.Зайцев.

Волжскышто шуко пачашан объект-влакым чоҥымо дене пырля аварийный пӧрт-шамычымат кораҥдат. Нунын кокла гыч иктыжын кумдыкыштыжо республикым вуйлатышын пашажым шуктышат лийын.

Олан мэржын увертарымыж почеш, тений 8 аварийный пӧртым рончымо, идалык мучаш марте эше 12 зданийым кораҥдаш палемдыме. 2023 ийыште 45 пӧртым рончен кораҥдаш кӱлеш.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий