Марий Эл вуйлатыше Юрий Зайцев республикысе Кугыжаныш юридический бюрон пашаеҥже-влак дене вашлийын.
Ушештарена, организацийын тӱҥ пашаже – СВО-н участникше да нунын лишыл еҥышт, боевой действийын ветеранже, нужнарак илыше, 1-ше да 2-шо группын инвалидше, пашан ветеранже, шуко шочшан еш, опекун, йочам ашнаш-влаклан полышым яра (тӱлыде) пуаш. Нуно посна категориян граждан-влаклан шотлалтыт.
Юрист-влак районлашке жапын-жапын шкештак лектедат. Тений 10 тылзыште 215 еҥлан полшеныт, тӱҥ шотышто консультацийым эртареныт. Спецоперацийыште колышо военнослужащийын ешыштыже улшо еҥ-влакын интересыштым аралыше письменный документ-влакым ямдыленыт да суд заседанийыште лийыныт.
Еҥ-влакын йодмашыштым шотыш налман, нунын негызеш правительстве шке пунчалже-влакым луктеш да паша радамым пеҥгыдемда, каласен Юрий Зайцев.
Лидия СЕМЕНОВА
Денис РЕЧКИНЫН фотожо
