Марий Элым вуйлатыше СВО-н участникше дене вашлийын.
Юрий Зайцев специальный военный операцийыште участвоватлыше сарзе землякна-влак дене пеҥгыде кылым куча.
14 июньышто регионым вуйлатыше отпускыш толшо военнослужащий дене Правительстве пӧртыштӧ вашлийын.
«Специальный военный операцийым эртарыме кумдыклаште мо ышталтмым пален налшашлан чыла йӧным кучылтам. Военнослужащийна-влаклан полшаш шуко жап ден вийым ойырена. Сарзе-шамыч деч тӱрлӧ увер социальный сетьла гоч пура, спецоперацийын участникше-влак мый декем шкештак толыт. Снабжений гыч тӱҥалын, чыла йодышым решатлаш тыршена. Те СВО-н участникше улыда, чолга граждан позицийым кучеда. Рвезе-шамычым могай йодыш тургыжландарыме, нунылан могай полыш кӱлмӧ нерген мутланынем ыле», – манын Ю.Зайцев.
Военнослужащий Марий Элым вуйлатышылан полшен шогымыжлан тауштен да сарзе-шамычлан кредалмаште, тыгак верланыме кумдыкышто мо кӱлмӧ, могай нелылык лекме нерген каласкален.
Вашлиймаш пайдалын эртен. Юрий Зайцев, СВО-м эртарыме кумдыклаште рвезе-влаклан мо кӱлмым ситараш, тыгак нунын Марий Элыште илыше лишыл еҥышт социальный полышын мерыжым налышт манын, мо лиймым чыла ышташ сӧрен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
