Марий Эл вуйлатыше Юрий Зайцевын кӱштымашыжым шуктен, правительстве председательын икымше алмаштышыже Михаил Васютин Волжск олашке миен коштын.
Правительствын икымше зампредше 12-шо №-ан школышто, тулык да ача-ава-влакын ончымышт деч посна кодшо йоча-влаклан рӱдерыште, «Йоча – Волжск олан ончылыкшо дене» верысе мер ушемыште лийын.
Михаил Васютин тыгак «Кугу Отечественный сар ийлаште вуйыштым пыштыше воин-влаклан обелиск» памятник воктенысе скверым, Волжскын рӱдӧ площадьшым ончен савырнен. Нине кумдык-влакым 2023 ийыште «Оласе йырвелым йӧнаным ыштымаш» федеральный проект почеш тӱзатыме.
Олан рӱдӧ площадьшым тӱзатыме проект VII всероссийский эн сай проект-влак конкурсышто сеҥышыш лектын. Тыште ондак йолешке-влакын коштмо верыштым олмыктымо, вӱд йоген кайыме верым ыштыме, волгыдым пуышо системым вашталтыме, видеоэскерымашым келыштарыме, йоча площадкым чоҥымо.
Леведыш-арке поснак сӧрал коеш, тудын йымалне лӱҥгалтыш кеча. Еҥ-влаклан каналташышт кызытсе жаплан келшыше олымбал, оҥа дене петырыман бетон пуф-влакым вераҥдылме, тыштак – велосипедым шогалташ вер, шахматла модаш ӱстел-влак. Тылеч посна рӱдӧ площадьыште кукшо фонтанат уло.
Миен коштмыж годым М.Васютин ончычсо «Родина» кинотеатрым ончен савырнен. Тудым уэмдымек, тыште Йоча сымыктыш школ лиеш. Олмыктымо паша «Культура» нацпроект дене келшышын шукталтеш.
Мучашлан Волжск ола администрацийыште совещаний эртен, тушто социальный объект-влакым чоҥымо да олмыктымо йолдыш-влакым каҥашеныт.
Марий Эл Республикым вуйлатышын администрацийжын
информаций паша пӧлкажын уверже негызеш
Л.СЕМЕНОВА ямдылен
Д.Речкинын фотожо
