Марий Эл писатель ушемлан – 90 ий
Кодшо кечылаште Талешке кечым кумдан палемдышна. Марий калыкнан тале шочшыжо-влак шочмо мландынам акрет годсек тӱрлӧ сарлаште араленыт. Таче кечынат марий талешке-влак шочмо кундемнам тӱзатат, кугу кӱкшытыш нӧлтен шогат. Нунын коклаште сылнымут мастар-влакымат ончыл радамыш шындена.
26 апрельыште В.Колумб лӱмеш республикысе йоча да самырык-влаклан книгагудышто «Российын эн сай туныктышыжо» лӱмым нумалше, Марий Эл писатель ушемын йыжыҥъеҥже, 20 книган авторжо Дина Рычкован «Чон гыч лекше мутйолва» пайремже эртен. Таче тидын нерген мутнам вашталтена.
– Дина Михайловна, те сылнымут вашлиймашым тӱрлӧ школышто, книгагудышто, тоштерыште чӱчкыдын эртареда. Каласыза, черетан пайремыште мо эн вучыдымо да куанле лийын?
– Ик кугу событий ӧрыктарыш да куандарыш! Лачак ты кечылан толын шуын «ZOV сердца» лӱман у книга. Ныл йылме дене возымо почеламут аршашым СВО-шко колташ ямдылыме. Руш, тува, хакас йылмыла гыч чыла возымым марлашке кусаренам. Тыгай пашамым Россий писатель ушем да Тыва Республикысе тӱвыра министерствын чапкагазышт дене палемденыт. Тиде пӱтынь Марий писатель ушемланат кугу чап, шонем.
– Тендан творчествыштыда самырык тукымым патриот семын шуарымаш теме эн кугу верым налеш. Поснак «А шӱм шарна» ойлымаш книгадам да «Шочмо Эл, Сеҥымаш да Йӧратымаш нерген почеламут-влак» сборникдам ончыктыман. Теве тиде пайремат специальный военный операцийыште кредалше-влаклан пӧлеклалтын.
– Пайремыш толшо-влак коклаште Советский посёлкысо сымыктыш школын преподавательже да уста мурызо Татьяна Смородинова-Галкина лийын. Тудо, «Мужество» орден дене палемдалтше, вуйжым Украин мландеш пыштыше талешке салтак шольыжо Иван Смородиновым шарнен да чапландарен, шке возымо мурыжым йоҥгалтарен, колыштшо-влакын чоныштым геройым шарнаш таратен.
Чонеш логалше почеламут-влак йоҥгалтыныт. Вет кажне мутсавыртышыжым шӱмем вошт колташ тыршем, лудшемым Шочмо элым да калыкым йӧраташ ӱжам.
– Российысе «Боевое братство» ушемын тале патырже, поэт, писатель да публицист Наталия Семьянская пайремышкыда лӱмынак Москва гыч толаш вашкен…
– Наталия Викторовна пытартыш жапыште моткоч кугу пашам ышта. Тудо «ZOV сердца» у савыктышым, тыгак Марий Элысе «Патриот» сылнымут ушемын альманахше-влакым, мыйынат ятыр книгам ончыл линийыш намиен коден, салтак-влаклан лач поро мутым ойлен да мӧҥгӧ илыше толаш тыланен. Тыгакак Наталия Викторовна Россий писатель ушемыште вуйлатыше-влак дене вашлийын мутланен, марий сылнымут мастар-влакын надырышт нерген каласкален.
– Тендан произведенийда-влакым лудмо годым педагог улмыда моткоч раш шижалтеш. Лудшым порылык да патриот шӱлыш авалтат, шонаш да аклаш таратат.
– Талешке кечын эртаралтше вашлиймаште Марий кугыжаныш университетын студентше-влакат лийыныт. Илен-толын, нуно калык дене пашам ышташ тӱҥалыт, ончыкылан урокым налыныт, Шочмо элым утларак йӧраташ кӱлмым шижыныт манын ӱшанем. Поро деч поро мутым пӧлекленыт Анатолий Васильевич Муравьёв, Юрий Ильич Соловьёв, Римма Григорьевна Катаева, «Пегас» сылнымут ушемын вуйлатышыже Галина Алексеевна Чиркова, Россий Федерацийын сулло туныктышыжо Ираида Дмитриевна Овечкина, «Кугарня» газетын тӱҥ редакторжо Ирина Степанова, «Шернур вел» газетын тӱҥ редакторжо Валентина Таникеева да шуко моло лӱмлӧ еҥ-влак. Чылаштлан моткоч кугу тау.
Марий эстрадын мурызыжо-влак Галина Якушева ден Светлана Петрова шочмо кундемым чапландареныт.
– Моткоч чаманем, сылнымут пайремышкыда миен кертын омыл. Шӱмда гыч лекше мутйолва-влак шуко еҥын чонжым пудыратат, йӱлатат, шонаш таратат. Лач тыгай мут-влак кӱлыт тачысе тургыман саманыште! Те шкежат, Дина Михайловна, марий талешке улыда.
Л.СЕМЕНОВА мутланен
Снимкыште: сылнымут пайрем годым.
Фотом еш альбом гыч налме
