УВЕР ЙОГЫН

Калыкнан илышыжым шергалше савыктыш

2-3 ноябрьыште Марий форумын шыже сессийже эртен. Тушко Башкортостан, Татарстан, Удмурт республикла, Угарман, Киров кундемла гыч марий НКА-влакын еҥышт, республикнан районлаж гыч мер пашаеҥ-шамыч чумыргеныт.

Икымше кечын Национальный президент школ-интернатыште «Марий сандалык» журналлан  – 10 ий: сеҥымаш да йодыш-влак» конференций лийын.

Журналым лукшо-влакым Марий Эл правительстве председательын икымше алмаштышыже М.Васютин, Кугыжаныш Погын вуйлатышын алмаштышыже  А.Иванов, тӱвыра, печать да калык-влакын пашашт шотышто министрын алмаштышыже М.Матвеев, Тӱҥ Онаеҥ А.Таныгин, Оньыжа Э.Александров саламленыт.

Мер Каҥаш вуйлатышын икымше алмаштышыже, «Марий сандалык» журналын тӱҥ редакторжо В.Мочаев савыктышын 10 ияш паша лектышыж дене палдарен, журналыште улшо рубрике-влак, савыктышым республикна мучко, вес субъектлаш шаркалыме нерген каласкален.

Тыгай чапле, глянц кагазан, калыкын тӱрлӧ илыш шӧрынжым авалтыше журнал эсогыл Российысе моло финн-угор калыкын уке, садланак  Марий Эл деч тора кундемыште илыше-шамыч тидым поснак аклат да кажне номерым шӱм вургыж вучат. Тидым залыште шинчыше-влак, поснак книгагудо пашаеҥ-шамыч икмыняр гана палемдышт.

«Марий сандалыкыште» историй тематикылан кугу тӱткышым ойырат. Тидын нерген историй науко кандидат С.Свечников докладыштыже каласен. Савыктышыште марий калыкын акрет ден кокла курымласе историйже нерген 10 статьям савыктыме. ХVII-XIX курымласе жапым 23 материалыште ончыктымо. ХХ- ХХI курым тӱҥалтышысе пагытлан 153 материал пӧлеклалтын.

Журналыште историй дене кылдалтше эн шуко шымлымаш паша историй шанче доктор, профессор, Россий Федерацийын кӱшыл школжын сулло пашаеҥже  К.Сануковын (44 статья) савыкталтын. Кокымшо верыште –  марий серызежурналисткусарыше, литературовед, краевед, Марий Эл Республикысе тӱвыран сулло пашаеҥже Г.Зайниев (17 материал), кумшо верым журналист, фольклор ден этнографийым шымлыше, Угарман кундемыште илыше Николай Морохин (12 шанче паша) айла. Нылымше верыште –  историй науко кандидат Александр Акшиков (8 паша). Валерий Мочаев Александр Акшиковын марий калыкын историйжым  у могырым ончалмыжым мокталтен. Тудын ик шанче материалже поснак ойыртемалтше. Тушто марий тиште эше Х курымыштак лийын манын палемдыме. Сергей Константинович шанче-историк-влакым пашаштым научный йылме дене огыл, а калыклан умылаш лийшын ямдылаш темлен.

Тыгак журналыште Марий самырык тукым слётлан кугу верым ойырымо нерген кутыреныт.  Слётын пашаж нерген журналист А.Иванова кумдан каласкален. Тудын палемдымыж почеш, тиде мероприятий марий ӱдыр-рвезе-влаклан вияҥашышт, кушкашышт кугу йӧным пуа. Тыгак Марий Эл деч тора кундемыште илыше-шамычлан йылмыштым, тӱвыраштым, йӱлаштым жаплаш туныкта.

А «Марий сандалык» журналыште лекше «Саскавий» журнал нерген тудын редакторжо, «Ямде лий» журналын тӱҥ редакторжо Л.Семёнова каласкален. Тиде  савыктыш 2012 ийыште икымше гана ош тӱням ужын.

Пленарный заседанийым Мер Каҥаш вуйлатышын икымше алмаштышыже, «Марий сандалык» журналын тӱҥ редакторжо В.Мочаев иктешлен. Журнал ончычсо семынак ныл гана лекташ тӱҥалмым, савыктышлан электрон подпискым почмо нерген, пурышо темлымашым шотыш налаш пунчалын.

Кас велеш журналын лӱмгече пайремже Республикысе самырык театрыште гӱжлен. Туштак В.Кузьминыхын, Д.Речкинын, А.Хватын фотовыставкышт пашам ыштен.

3 ноябрьыште Марий Элын мер-политике рӱдерыштыже Мер Каҥашын пленумжо эртен. Оньыжа Э.Александров 2018 ийыште Мер Каҥашын ыштыме паша лектышыж дене палдарен, шушаш ийлан ыштышаш паша планым  пеҥгыдемден. Тыгак пленумышто Мер Канаш пелен ыштыме комиссий-влакын ыштыме пашашт нерген кутыреныт. Национальный президент школ-интернатын директоржо, Мер Каҥашын образований шотышто комиссийжын председательже Л.Иксанова республикысе тунемме тӧнежлаште  марий йылмым туныктымо йодышым нӧлталын. 

Лидия ШАБДАРОВА.

М.Скобелевын фотожо.

 

Опубликовать в Одноклассники

Добавить комментарий