Ял илыш

Йошкар-Ола воктенысе ялыште

Тачысе унана – Медведево район Сидорово селаште илыше кидмастар Пётр Павлович Першуткин. Тудын дене Яблочный уремыште верланыше пӧртыштыжӧ вашлийын мутланышна. Тиде Сеҥымаш кече деч вара лийын, сандене эн ончычак тусо тулан жап нерген мутым тарватышна.

– Ачам Павел Алексеевич Андреев Кугу Отечественный сарыш Кузнецово села гыч каен. Тудын боевой корныжым интернет полшымо дене кычал муынна – Берлин марте шуын улмаш. Сар гыч тудо старший лейтенант званиян пӧртылын, – каласыш Пётр Павлович.

Сидорово ял Йошкар-Ола воктенак, сандене тушто илыше-влак кокла гыч шукынжо тыште мланде кумдыкым лач тидлан кӧрак налыныт. Южыжо кугу пӧртым чоҥен шынден, гын, икмынярже изи пӧртым нӧлтен шынден да садпакчам куча. Першуткинмыт ешым кокымшо тӱшкашкыже пурташ лиеш. Шкешотан оралтыже 12 сотык мландыште верланен, тудым ужар мотор профнастил дене печен налме.

Кудывечыш пурымо годымак шуко оҥайым ужаш лиеш.

Сад гыч изи пӧртыш чаткан оптымо тротуар пурта. Верандыште тошто  оралтысе арвер-влак аралалтыт: кочажын пидме креслыже, ӱстембал, самбар-шамыч.

– Мый Курыкмарий район Кузнецово селаште шочынам, – шкеж нерген каласкалаш тӱҥале Пётр Павлович. – Марий кугыжаныш университетым тунем пытаренам. Олаштак ешым чумыренам. Пелашем Елена Петровна – йочасадыште воспитатель. Мый ятыр ий туныктышылан, чодыра озанлыкыште системе администраторлан пашам ыштенам. Изи пашадарлан кӧра энергетик-влакын радамышкышт куснаш пернен. Сулен налме канышыш лекме  ийготым  шуынам гынат, «Таврида Электрик» предприятийыште пашам ыштем. Коло ий ончыч тиде ялыште налме мланде кумдыкышто шке вий дене пу пурам поген шынденам. Вара – верандым, гаражым, кок мончам. Изирак мончаштыже шке мушкылтына, а кугуракше – уна-шамычлан. Тротуарыш тӱрыснек  плиткым шарыман, верандыште кӱварым уэш вашталташ шонем да эше туврашым уэмдаш кӱлеш.

Монча омсамат пӧръеҥ шкак пу гыч фигур-влакым пӱчкеден сылнештарен. Кугурак мончасе коҥгам кӱртньӧ гыч ыштен, кӧргышкыжӧ шокшым кучаш кӱм  оптен.

Суртоза моло оралтым, садпакчажым кумылын ончыктыш.

– Кызыт тыште пареҥгым, киярым, помидорым, пеледыш ден олмапум ончен куштена. Эҥыжвондым пече воктек радамын шынденам. А метрат пеле гыч кокымшо радамышке шоптыр ден пуншоптырым вераҥденам. Шыжым шоптыр саскам эсогыл куш чыкаш огына пале, тунар шуко шочеш. Латкок олмапу  кушкеш. «Штрефлинг», «Золотой налив», «Уэсли», «Грушовко» сорт-влак улыт. «Уэсли» урлыкын саскаже шошо марте аралалтеш. А Курыкмарий гыч кондымо  вишнеты мландыште сайын ок илане. Илана гынат, саскаже шагал лиеш. Тудлан  чапле мланде кӱлеш, – каласыш Пётр Павлович. – А олмапу-влаклан у шӱлышым пуртем, нуным прививатлем. Паша ятыр. А ачалыме «Газ-69» автомашинаж дене автопробегыш лекташ ямдылалтеш.

М.СКОБЕЛЕВ

Авторын фотожо

Опубликовать в Одноклассники

Добавить комментарий