Марий Элыште йочасад ден школ-влакым у национальный проект-шамыч полшымо дене капитально олмыкташ тӱҥалыт.
Эртыше кечылаште регионым вуйлатыше Юрий Зайцев республикысе муниципальный образований-влакын администрацийыштым вуйлатыше-влак дене эртарыме совещанийыште лач тидын шотышто мутланен. Погынышо-влак Марий Элын «Еш», «Молодёжь да йоча-влак» у национальный проектлаш ушнымо шотышто, тыгак республикысе мунципальный образований-шамычын генеральный планышт, мланде дене пайдалыныме да тушто чоҥымо паша, шокшым пуртымо схемым каҥашеныт.
Федеральный собранийлан посланийжым ойлымо годым Россий Федераций президент Владимир Путин увертарен: 2025 ий гыч Российыште йочасад ден школлам капитально олмыктымо дене кылдалтше программе илышыш пурталташ тӱҥалеш.
Марий Эл образований да науко министр Лариса Ревуцкаян мутшо почеш, кызыт Россий Федерацийысе Просвещений министерствыш йодмашым пуаш документ ямдылалтеш.
Республикым вуйлатыше палемден: Россий Федераций президентын йочасад ден школлам капитально олмыктымо программым илышыш пуртымо тунемме верлан оралтышт дене кылдалтше ик эн пӱсӧ йодыш-влакым решатлаш йӧным ышта.
Совещанийыште тыгак чоҥымаш, архитектур да илыме вер-коммунал озанлык министр Александр Криворотов увертарен: кызыт мланде кумдыкым планироватлыме да олаште чоҥымо пашам шуктымо дене жаплан келшыше документым ыштыме шотышто Марий Эл федеральный рейтингын «ужар зоныштыжо». Мунципальный документла почеш республикна лу эн сай регион-влак радамыш пура. Чыла тиде пашалан Марий Эл правительстве верысе кучем орган-шамычлан 44 миллион утла теҥгем ойырен.
Марий Эл вуйлатышын пресс-службыжын уверже негызе Г.Кожевникова ямдылен
