Марий Элын Перинатальный рӱдерыштыже «Кече волгыдым пӧлекле» поро кумыл фондын тӱҥалтышыж почеш «Единый Россий» партийын Генеральный советшын ава улмым, йоча пагытым аралыме да еш-влаклан полшымо комиссийжын, тыгак Президент грант-влак фондын полшымышт дене азам ыштыме деч вара тӧрланыме кабинетым почыныт.
Поро кумыл фондын «Пырля – илышыш» проектшын кышкарыштыже почмо кабинетыште азам ыштыше ӱдырамаш-шамычлан психологий велым пеҥгыдемаш да чызым пукшаш тӱҥалаш полшат. Тидыже поснак азам жап деч ончыч ыштыше ава-влаклан кӱлеш.
– Элыштына азам кудалтыме деч ончыч мутланыме кабинетат, мӱшкыран ӱдырамашын тазалыкшым эскерыме рӱдерат, самырык ача-ава-шамычлан школат улыт, а теве азан ӱдырамашын шуко йодышыжым специалистын полшымыж дене рашемдаш полшымо вер уке ыле, – манеш «Кече волгыдым пӧлекле» фондын директоржо Саниям Коваль. – Нелылыкыш логалше ава-влак шкетын огыл улмыштым, мыланна эҥертен кертмыштым умылышаш улыт. Тидым поснак жап деч ончыч шочшо да кужу жап азам ыштыме пӧртыштӧ кийыше йочан ӱдырамаш-шамычлан ойлем. Таче почмо кабинетын консультантше-влак тургыжланымым да кокытеланымым чактараш, пӱсӧ да неле йодышлам решатлаш палемдалтыныт.
Кабинетым почмо годым тасмам ончыкылык ава Марина Кириллова пӱчкын. Тудо Перинатальный рӱдерын медицине пашаеҥже-влаклан мӱшкыран ӱдырамаш-шамычлан кугу тӱткышым ойырымыштлан тауштен да у кабинетым еш-влаклан полшымо кӱлешан вер семын палемден.
– Кабинетын тӱҥ пашаже – ӱдырамашлан пиалан да шуко шочшан ава лияш йӧным ышташ, – торжественный мероприятийыште палемден Марий Элын Россий Федераций президент пеленысе постоянный представительже Ольга Бадма-Халгаева.
– Тиде событий элыштына йоча-влакын эреак ончыл верыште улмыштым эше ик гана пеҥгыдемда, – ешарен Сар-влакын ветераныштын республикысе клинический госпитальыштын тӱҥ врачше Алексей Красильников.
«Кече волгыдым пӧлекле» фонд лишыл жапыште тыгаяк кабинет-влакым Санкт-Петербургышто да Белгородышто почаш палемден.
М.ИВАНОВА
Марий Эл Тазалык аралтыш министерствын фотожо
