Элнан медицине вузлажым целевой набор дене тунем пытарыше выпускник-влак Республикысе клинический больницыште регионысо медорганизацийлан тӱҥ врачышт дене вашлийыныт.
Тазалык аралтыш министр Марина Панькова самырык специалист-шамычлан республикын «Тазалык аралтыш системын медицине организацийлаштыже квалифицироватлыме кадрым ситарымаш» регионысо проектым илышыш пуртымо кышкарыште шуктымо задачыже-влак нерген каласкален, кучемын медицине пашаеҥ-шамычлан социально полшымо мерыже-влак дене радамын палдарен.
– Таче кадр йодыш эн пӱсын шога, – манын тудо. – Кызыт мыланна тӱрлӧ специальностян 336 врач кӱлеш. Поснак участкысе терапевт, анестезиолог-реаниматолог, акушер-гинеколог, невролог, травматолог-ортопед-влак огыт сите. Сандене пашаш пураш але ординатурыш специальностьлан тунемаш каяш тарваныме деч ончыч отрасльын йодмашыжым шотыш налаш темлем.
Марина Викторовна вуз-влакын выпускникыштлан медицине организацийласе паша условий, пашадар, социальный льгото да гарантий-шамыч нергенат каласкален. Мут толмашеш, тений 1 март гыч медик-влакын пашадарышт палынак кугемын, а районласе медорганизаций-шамыч эше шкеныштын социальный гарантийыштым темлат, поснак – эн кӱлешан специальностян врач-влаклан.
Выпускник-влак кокла гыч ужашыже, кок ий гыч республикыш аҥысыр специальностян врач лийын толаш манын, ординатурыш тунемаш кая, икмынярже шушаш шыже гыч регионысо поликлиникылашке участкысе терапевтлан пашам ышташ тӱҥалеш.
М.ИВАНОВА
Марий Эл Тазалык аралтыш министерствын фотожо