Чылажымат вискален ыштыман
Советский район Яҥгранур мийыме годым ялыш пурымаште мотор спорт площадкым, канде тӱсан кӱварым, тыгай тӱсанак беседкым ужынна. Тидым чыла Яҥгранур ялын кечылан кум ий ончыч ыштыме. Кӱвар ден беседкыжым Александр Еменгулов ял калык полшымо дене ыштен. Кидмастар ял мучаште канде тӱсан пӧртыштӧ ила. Тудын суртшо молын деч койын ойыртемалтеш.
Еменгуловмытын суртышт ваштареш шоҥго писте кушкеш. Сурт-печыжым тачысе илышлан келшен толшо чоҥгымо материал дене ыштыме.
— Илен-толын, ял кумдыкым калык дене пырля тӱзаташ шонем. Памаш воктенеысе верымат шотыш кондыман. Юмо полша гын,тиде паша шукталтеш, — манеш Александр Фёдорович.
Икмыняр жап мутланымеке, Еменгуловмытын суртыштым ончалаш пурышна. Суртоза пӧғт пелен улшо кумдыкшым вичкыж оҥа дене печен шынден. Оҥам,брусым вашке ынже пыте манын,тӱжвачын антисептк дене чиялтен. Пӧртын,беседке, монча леведышым йошкар профнастил дене леведын. Леведыш тӱрыштӧ йӱр вӱдым колташлан ош калай пучым сакен. Беседке окнам тӱрлӧ тӱсан поликарбонат дене петырен шынден. Беседкыжат тӱрлӧ. Иктыже кеҥежлан келыштарыме, весыже — телылан. Телымсыштыже коҥам келыштарыме.
Аалександр Фёдорович пӧртын цокольжым кермыч дене уэмден оптен. Пӧрт пырням тӱжвач канде чия, а пӧрт лукшым ош чия дене чиялтен. Пластик окнам шынден. Окна сергамат моторын келыштарен.
— Мутат уке, сурт-печым нӧлтымӧ годым чыла вискален ыштыман,транспортым тарлаш роскотым да чоҥымо материалан акшым шотыш налман. Чоҥымо материал чапле лийже, но акше утыждене шерге ынже лий манын, вуйым чотак пудыратылаш логалын. Мыйын шонымаште, материалжымат шотаным налынна, — мане суртоза.
Михаил СКОБЕЛЕВ,
Лидия ШАБДАРОВА
М.Скобелевын фотожо
