У Торъял район Масканур ялыште лиймына годым верысе тӱвыра пӧртын вуйлатышыже кидмастар Елена Смирнова дене палыме лийна.
Оралтыш пурымекына, тушто юалгырак улмым вигак шижна. Елена Николаевна тӱвыра пӧртым олмыкташ жап шуын, леведышым вашталтыман, молымат шотыш кондыман манын каласыш.
Клубым ончал савырнымеке, пурла велне лукышто курчак-влакым шекланышым. Нунын сайын шымлен, кучен ончымем шуын колтыш. Тыгай сӧралым кӧ ыштен йодмемлан, Елена Николаевна «Мый ыштенам» мане. Тыге тиде чапле коллекций нерген мутланымашнам шуйышна.
– Эн ончыч Агриппина курчакым ыштена, вара — Барыням, Василисам, Марьюшкам, Аринушка нылымше «шочын». Чыланат мультфильмласе геройжо-влак улыт, – каласыш кидмастар.
– Мый вет тыште шочынам. Вара ача-авам дене Кубань Краснодар крайысе Ленинградский станицыш, каенна. Кызыт тушто изирак шӱжарем ила. Ваш-ваш унала коштына. Марий Элыш 1987 ийыште пӧртылынна. Эн ончыч У Торъял район Йогошын ялыште иленна, вара Масканурыш кусненна. Мый верысе школыш 8-ше классыш каенам. А ковамже теве Ронго вел гыч, – шкеж нерген палдарыш Е.Смирнова.
Кидмастар мастарлыкшым интернет полшымо дене шуара. Курчакым «шочыктымо» ятыр видеом онча. Пашаштыже меж ден капроным кучылтеш. Меж гыч курчакым ыштыме технологийже фелтинг маналтеш. Тудын дене ятыр кидмастар пайдалана. Курчаклан модыш шинчам тыгак интернет дене заказатла. Ты кидпашалан ӱдырамаш 2013 ий гыч шӱмаҥын.
– Ондак курчакым калыкын йодмыж почеш ыштенам, ужаленам. А кызыт тыгай моторлыкым еҥлан пуаш чаманем. Нуно мыланем лишыл лийыныт, манаш лиеш. Ыштыме годым кажныж дене мутланем. Пуйто нуно чонан улыт. Теве лукышто чумырымо коллекцийже «Йомакысе курчак» маналтеш. Шукыжым коча ден кова чуриян курчакым ыштылам. Ом пале молан, но илалше чуриян мыланем утларак келша. Теве тиде курчакшым У Торъялысе Иоанн Богослов лӱмеш черкын батюшкаже ышташ йодын, – палдарыш Елена Николаевна.
Масканур тӱвыра пӧрт пелен эше «Мастерица» клуб пашам ышта.Тушко кажне арнян йоча веле огыл, кугурак-влакат погынат.
– Кружокыш шке икшывем-влак, мариемын шӱжарже Августа Новоселоват коштыт. Тудын кок пашажым тыште ужаш лиеш. Тыгак кугезе уныкам-влак Дарья ден Мария Александровмытат курчакым ыштыме пашашке ушненыт.Ончыч ялыште курчакше чурийдыме лийын. Тудым куэм гыч пӱтырен ыштат ыле. Нуным аралтыш семын кучылтыныт, – мут мундыражым умбакыже рончалтыш кидмастар.
Ялысе илыш нергенат мут лекте. Тыште медпункт, кевыт улыт. Верысе калык «Первый май» колхозышто да села воктенак улшо «Акашевский» сурткайык фермыште тыршат. Южгунам вахте дене тора кундемлашке коштыт. Масканурышто ятыр илалше еҥ ила.
– Пӱртӱс газна лийын. Ынде тудым пуртеныт, чылалан огыл гынат, сай тӱҥалтыш уло. Мемнан уремыште ме веле илена. Кеҥежым дачник-влак толыт. Суртыштына – паровой отоплений. Мыланна келша. Воктенак электроҥгам шындыме, счётчикна кок тарифан, пеш йӧнан.
– Чодыраштыда маскат уло докан, арам огыл кундемдам Масканур маныт? – йодым.
– Уло, но ме маскам огына тӱкӧ, сандене чодыраште лӱдмашан огыл, – вашештыш кидмастар да шыргыжале .
М.СКОБЕЛЕВ
Авторын фотожо
