Йошкар-Олаште тений кеҥежым «Марий калыкын легендыже-влак»
пу скульптур всероссийский фестиваль-конкурс эрта.
Фестиваль кок йыжыҥлан шелалтын: 31 май марте тушко ушнаш шонышо-влак теме дене келшен толшо скульптурын эскизшын сӱретше дене пырля uprku@mail.ru электрон адресыш йодмашым колтышаш улыт. 6-10 августышто скульптурыжымак ыштыман. Тидыже Йошкар-Олаште, Сомбатхей микрорайонышто верланыше «Марий паркыште» лиеш. Конкурсыш 18 ияш деч кугурак ийготан кидмастар-влак ушнен кертыт.
Фестиваль жапыште ыштыме арт-объект-влак дене варажым «Марий паркым» сӧрастараш тӱҥалыт. Мероприятийын художественный вуйлатышыже – спидкарвинг – бензопила дене скульптурым пӱчекедымаш) дене тӱнян чемпионжо Владимир Алманов. Пашаже-влакым ончен, чылт ӧрат: кузе нуным тыге илышыште гаяк чын койшым ышташыже лиеш? Поснак йомакысе геройжым але пӱртӱсысӧ янлыкше-влакым налаш гын. Тидым те фотосӱретла гочат ужын кертыда.
Владимир – Курыкмарий кундемын Шайыл Пӧртныр ялын шочшыжо, Йошкар-Олаште талантан йоча-влаклан национальный президент школым тунем лектын. Моткоч кугу таум икымше туныктышыжо Юрий Михайлович Морозовлан ышта. Лач тыште тудо ончыч сӱретлаш, вара пу гыч пӱчкедаш тунемын. Илен-толын, тидлан кӧрак эше ий, лум, ошма, бетон гыч бензопила дене скульптур-влакым пӱчкедаш тӱҥалын. Икымше гана 2010 ийыште тидлан шӱмаҥын. Вара тӱрлӧ кӱкшытан тӱнямбал, всероссийский, регион-влак кокласе конкурслаште мастарлыкшым тергаш да шукыж годым ойыртемалташ тӱҥалын. 2019 ийыште Финляндийыште Российын чапшым арален да тӱнян чемпионжо лийын. Тунам 30 минут жапыште маскам пу гыч пӱчкеден луктын. Икымше вер дене моло вереат ятыр гана палемдалтын.
Амал деч посна огыл ача-аваже президент школыш тунемаш колтеныт. Ачаже Николай Алманов – уста сӱретче. Кызыт тудын лӱмгчыжлан пӧлеклалтше ончер Н.Игнатьев лӱмеш Салымсоласе краеведений тоштерыште почылтын. Кочажат – Пётр Федорович – пу гыч пӱчкеден.
Владимир кызыт ешыж дене Моско областьысе Сергиев Посад олаште ила. Туштак Богородский художественный техникумым, вара Москосо кугыжаныш областной университетым тунем лектын. 15 ий ты техникумыштак богородский резьбалан туныктен. Пытартыш ийлаште шкенжым йӧратыме пашажлан пӧлеклен. Пу гыч пӱчкедыме пашаже таче тудын хоббижат, бизнесшат. Ятыр проектым илышыш шыҥдарен. Тидлан кӧра элна, тӱня мучко кудалыштеш, у вер, еҥ-влак дене палыме лиеш. Самозанятый семын пашам ышта, но ик верыште ок шинче. Телефон дене мутланыме годым, кызыт Нижний Новгородышто улам, А.С.Пушкинын шочмо кечыже вашеш Болдиныште паркым почмылан йомакше почеш кок скульптурым ямдылем мане. Вара Москваш, Пекиныш, Якутийыш, Камчаткыш кайышаш. «Каналташат жапым мунем», – мане шкеже. Усталыкшылан кӧра Владмирым эре гаяк тӱрлӧ конкурсыш, фестивальыш участвоватлаш гына огыл, эксперт семынат ӱжыт.
– Молан мый лачшымак пушеҥге дене пашам ышташ йӧратем? Тиде – пӱртӱс материал, юж гай, шкенжын чонжо уло. Пашам ыштыме годым тудын дене мутланемат. Тунам скульптурат сай лектеш. Йошкар-Олаште лачшымак марий калык тӱвыра дене кылдалтше тыгай фестивальым эртараш эре шонен коштынам. Молан манаш гын шуко вере участвоватыме жапыште шекланенам: мемнан кундемыште мастар-влак шукын улыт, но ӱмылеш кодыт. Ты фестиваль нунылан шкем ончыкташ полшышаш. Тушто мастер-класс, конкурс сынан таҥасымашат лийыт. Ты фестивальыште лачшымак калыкнан ойыртемжым, йӱлажым почын пуаш шонем. Юмылан тау, тений тыгай мероприятийым эртарыме шотышто марий рӱдоласе администраций дене ик ойыш шуын кертме, – каласыш мастар еҥ.
Тудын рашемдымыж почеш, фестивальыш Российысе ятыр регион гыч пу дене пашам ыштыше скульптор-влак толаш кумылым ончыктеныт. Но В.Алманов садак утларакшым шкенан велысе мастар-влакым тушто ужнеже. Тематикыжымат садланак «Марий калыкын легендыже-влак» дене кылден.
Мо оҥайже, Владимир кеч-могай усталык фестивальыш пырля аралтыш семын аважын лӱмын полеклыме марий тӱран тувырым наҥгая.
Светлана Носова
Снимкылаште. В.Алманов да тудын пашаже-влак.
Фотом В.Алмановын еш альбомжо гыч налме.
