6 июньшто Свердловск область Изи Тавра ялыште Марий Эл Республикысе йоча ден самырык-влаклан театр-рӱдерын артистше-влак «Ачай, ачием…» спектакльым модын ончыктышт.
Композитор В.Захаровын возымо семже касым поснак сылнештарыш. Балетмейстер Н.Макарован шындыме куштымашыже куандарыш. З.Долгован автор да режиссер пашажым мокталтыме шуэш, Артист-влак тудын шонымыжым калыклан мастарын луктын ончыктеныт.
Марий Элын калык артистше Игорь Актуганов Урал марий-влаклан шукертсек палыме да вучымо улеш. Ты гана тудо Вася ачан образшым сайын почын, кунамже шинчавӱдымат луктын.
Надежда Четкареван «Немыч вате» спектакльыште модмыжо пеш келшен ыле. Ты ганат ава рольым пеш устан почын пуэн. Артист Наталья Кораблева Полина кокайын образшым сайын ончыктыш. Артем Иркабаевын артист талантше койынак кушкеш. Артист-влак Александр Кожевников да Андрей Васильев мыланна палыме улыт, нунын модмышт мыланна эреак лишыл.
Маша ӱдырым модшо Таня Поповам Изи Тавра калык икымше гана ужын, но тунамак йӧратен шынден. Тудлан артист мастарлыкым умбакыжат шуараш тыланена. Олык Ипай лӱмеш премийын лауреатше Наташа Николаеват калык чоным шке декыже вашке савырен керте.
Тыгай артист-влакым куштымаште кугу таум Самырык театрын художественный вуйлатышыже, Россий да Марий Эл искусствын сулло деятельже Олег Иркабаев-Этайнлан каласыман. Спектакль деч вара артист-влаклан калык совым рӱж кырен тауштыш, сцене гыч кужу жап ыш колто.А вара чапле концертым ончышна. Тушто Надежда Пашкинанан усталыкшым аклаш йӧн лекте.
2018 ийыште Изи Тавра ялыште Урал марий-влакын черетан Агавайремышт эртаралтеш да Марий Элысе артист-влакым саламлыме да тау мутым каласыме годым Изи Тавра клубым вуйлатыше Виктор Александров нуным унала ӱжӧ.
В. БАКЕТОВ.
Авторын фотожо.
Снимкыште: Артист-влак Изи Тавра ял калыклан кугу пайремым пӧлекленыт.
