Кызыт тыге ойлен кертам, сандене «илем да, йӧра». Чынже денак тыге. Мо эше кӱлеш?! Тиде ош тӱняште мыйын иктаҥашем-влак моткоч шагалын кодыныт. Ме, 1947 ийыште шочшо-влак, шукын лийынна. Шернур районысо Тумерсола ялем шотыш налын ойлем. Шарналтем Кугу Коклала кыдалаш школысо классем, Палантай лӱмеш музыкальный училищысе курсым, Моско консерваторийысе духовик-влакын курсыштым. Чылаштыжат ик сӱрет – иктаҥашем-влак кокла гыч шукынжо укеат улыт, илыш дене чеверласеныт. Амалжат тӱрлӧ лийын кертеш. Иктаж-могай иктешлымашымат ыштен кертам, но кызыт шкем нерген веле ойлем. Шонымем почеш, тиде мландыште ӱмырем илен эртаренам манаш лиеш. А 2017 ий 25 сентябрь деч вара умбакыжат илымылан, 70 ийым темымылан — чылажат Российыште жаплан келшыше медицинылан кӧра.
Теве шоналтыза. Таче кечылан – вич операций! Тушечын кум ганаже наркоз полшымо дене малтен колтымеке операцийым ыштеныт. Чержат тӱрлӧ семын маналтыт. Чытен лекмемын иктешлымашыже — кокымшо группан инвалид улам. Чер дене кучедалаш полшышо-влакым кызыт порын шарналтен кертам. Кодшо курымын 50-ше ийлаштыже – тиде шке кундемын фельдшерже Дмитрий Романович Чемеков. А Йошкар-Олаште 1962 ий гыч тачысе кече марте тыршеныт: Николай Васильевич Дубровин, Тамара Никифоровна Турчина, Андрей Леонидович Пигалин, Евгений Васильевич Кузьминых, Михаил Сергеевич Хилько, Виктор Иванович Мухин, Дмитрий Сергеевич Муругов, Александр Егорович Прямиков, Людмила Валерьевна Буканова, Владимир Александрович Егоров, Василий Николаевич Дубровин. Мутат уке, тыгодым Марий кундемнан тазалыкым аралыше легендыже Лелия Ивановна Соколовам шарналтыман. Тудо мемнан музыкальный ешнан поклонникше лийын. Тудо эре гаяк концертнам ончаш коштын да йодмына годым икшывына, уныкана-влакланат полшен шоген. Шукерте огыл тудо ош тӱня дене чеверласен. Тек кийыме мландыже пушкыдо лиеш. Мыйын шӱмыштем тудо поро шарнымаш дене илаш тӱҥалеш.
