2014 ий 16 мартыште Крым автоном республик Украинын составше гыч лектын да Россий Федерацийыш пурымо шотышто референдумым эртарен. 97 % калыкше тидым ышташ кумылым ончыктен. Тений тиде кугу событийлан вич ий темеш. Тидын лӱмешак Российыште, тыгак Марий Элыште 16-17 мартыште «Крым шошо» фестиваль эртаралтеш. Тушко республикысе ола ден муниципальный район-влак ушнат.
Тӱҥ шотышто тӱрло концерт-акций, спорт таҥасымаш, шочмо элым йӧраташ кумылаҥдыше образовательный шагат, викторине, йоча усталык ончер-влак лийыт. Мутлан, Йошкар-Олаште пайрем мероприятий-влак Рӱдӧ каныме паркыште шуматкечын эртат. Тӱҥ шотышто нуно икшыве-влакым авалтат. А Т.Евсеев лӱмеш национальный тоштер 15-17 мартыште Крымын историйже дене кылдалтше образовательный мероприятийлам эртара. С.Г.Чавайн лӱмеш национальный библиотекыште «Россий да Крым: историйын лаштыклаже» ончер почылтын. Марий кугыжаныш университетыштат тиде датылан пӧлеклалтше кураторский шагат-влак лийыныт.
С.Носова.