Йошкар-Олаште преподобный Серафим Саровскийын военный гарнизонный храмыштыже специальный военный операцийыште участвоватлыше-влаклан маскироватлыше сетьым пидыт.
«Аван шӱмжӧ» гуманитар толкынын координаторжо Людмила Краюшкинан увертарымыж почеш, СВО-што участвоватлыше землякна-шамыч пытартыш жапыште поснак дизель дене пашам ыштыше генераторым, цифровой радиостанцийым, бензопилам, йӱдым ужаш лийме приборым, бинокльым, дальномерым, палаткым, ик киловат куатан генераторым, кеҥеж вургем ден йолчиемым, спирт негызан вӱдыжгӧ салфеткым, насекомый деч аралыше средствым, шере кочкышым да маскироватлыше сетьым йодыт. Пытартышыже, шкат паледа, штабым веле огыл, военный техникымат тушманын шинчаж деч шылта.
Республикыштына маскироватлыше сетьым Йошкар-Олаште, Курыкмарий, Марий Турек, У Торъял, Советский да моло ола ден районлаште пидыт.
– Черкын настоятельже протоиерей Александрын суапландарымыж почеш, меат тиде поро да кӱлешан пашаш февраль кыдал гыч ушненна. Ончычшо маскироватлыше сетьым лачшымак кузе пидаш кӱлмым интернетысе видеорепортажыште ончышна. Вара СВО-што участвоватлыше землякна-шамычын йодмышт почеш пидме йӧным изишак вашталтышна, кызыт кумшо схеме дене ямдылена. Тымарте фронтыш 44 сетьым колтенна. Лӱмын ургымо мешакыш эше ешартыш кандырам, карабиным, хомутым пыштена, кӱсенышкыже – юзо кампет ден изи юмоҥам, – каласкала Йошкар-Оласе Серафим Саровскийын храмжын прихожанже Наталья. – Пытартыш кандаш сетьым взводын мӧҥгышкӧ каналташ толшо командирже Бахмут велыш шкеак наҥгайыш. Амал дене пайдаланен, масксетьым пидме кум йӧннамат ончыктышым. Тудо пӱтыралын пидме сетьын йӧнанрак улмыжым палемдыш. Чон йӱлен тыршымыланна уло кумылын тауштыш.
СВО-што участвоватлыше эргына, пелашна, ачана, иза-шольына-шамычым тушманын бомбыжо да снарядше деч аралыше сетьым сеҥымашым лишемдаш полшышо-влак черкын административный зданийыштыже кечыгут пидыт (снимкыште). Нуно тыгак палаткылан тентым, сеть ден карабинлан сумкам ургат. Тиде пашашке кумылан моло еҥымат ӱжыт. А эше окса надырлан моткоч куанат, тудыжо материалым наледаш моткочак кӱлеш. Шийвундым 89877288818 номеран телефон дене Наталья Николаевна П.-н картышкыже колташ лиеш. Тиде номер денак сетьым ямдылаш полшымо йодышым рашемдаш йӧн уло.
Серафим Саровскийын черкыже Дубки микрорайонышто Тыныслык уремын 21-ше А №-ан пӧртыштыжӧ верланен. Тыште тыгак мобилизаций тӱҥалме пагыт гычак вӱргече еда 18.30 шагатлан СВО-што участвоватлыше сарзе-влакын тушманым писынрак сеҥымышт да ешышкышт таза пӧртылмышт шотышто Юмылан кумалыт.
М.ИВАНОВА
Фотом интернет гыч налме
