Татарстан Республик Агрыз район Буймо школышто Тунемше-влакын Российысе толкыныштын шочмо кечыжлан пӧлеклалтше мероприятий эртен. Тений тудлан кок ий темын. Буймо школын ӱдыр-рвезыже-влак ты пайремым оҥайын эртареныт: тӱрлӧ модыш дене модыныт, пӱртӱсым арален кодымо нерген мутланеныт.
А каникул жапыште 34 тунемше Казаньыш экскурсий дене миен коштын. Нуно Сеҥымаш паркыште, метрошто лийыныт. Шукыштлан метро келшен, вет нуно тудым икымше гана ужыныт.
Татарстанысе Национальный тоштерыште гид-влак ожнысо Казань, ты кундемыште илыше кайык, янлык-влак дене палдареныт. А Бауман урем дене эртымышт годым йоча-шамыч кинотеатрым, тӱрлӧ музейым, памятникым, театрым, сувенир кевытлам ужыныт. Казаньысе Кремльыште Кул-Шариф мечетьыш пурен лектыныт.
Тунемше-влаклан Татарстанын рӱдолаштыже моткоч келшен. Веселан да пайдалын эртарыме кечым эше шуко жап фото-влак шарныктараш тӱналыт.
Л.МИХАЙЛОВА.
Авторын фотожо.
