УВЕР ЙОГЫН

Кугыжаныш программе: Ешлан 9645 теҥгеат – полыш

Марий Элыште ава капитал гыч 9645 теҥге кугытан выплатым 4000 наре еш налын кертеш. 

Тудо тыгай еш-влаклан ойыралтеш, кушто кокымшо йоча 2018 ий 1 январь деч вара шочын, да ешысе кажне еҥын доходшо 15071 теҥгем ок эрте. Ава Пенсий фондыш иканаште кум йодмашым пуэн кертеш: сертификатым налаш, выплатым палемдаш да шочшо йочалан СНИЛС-ым ямдылаш.

«Мемнан ончылгоч шотлен лукмына почеш, тений республикыштына тыгай выплатым 4000 наре еш налын кертеш»,– увертара Россий Пенсий фондын Марий Элысе пӧлкажын социальный выплате отделжын начальникше Геннадий Тарасов.

Регионышто Пенсий фондын чыла виктемже ава капитал гыч тылзе еда тӱлыман выплатылан йодмашым налаш ямде, клиент службо-влакынат пашаштым вияҥдыме. Тылеч посна Пенсий фондын специалистше-шамыч «Шуко функциян рӱдер-влакын дирекцийышт» дене чак кылым кучат.

Тылзаш выплатым палемдыме нерген йодмашым кокымшо йоча шочмо деч вара 1,5 ий жапыште пуаш лиеш. Йодмашым пел ий марте пуаш гын, выплате аза шочмо кече гычак тӱлалтеш, пел ий деч вара – йодмашым пуымо кече гыч.

Тылзе еда тӱлыман выплате икшывын 1,5 ияш лиймешкыже ойыралтеш, но ик ий гыч йодмашым угыч пуыман, пеленже келшыше документ-влакым пыштыман. Ава капиталым тичмашнек кучылтмо, еш илыме вержым вашталта але икшывылан 1,5 ий темын гын, выплатым тӱлымым чарнат.

Ешын тыгай выплатылан праваже уло-укем рашемдышашлан пытартыш 12 тылзе жапысе чумыр доходым ончыч латкокытлан, вара ешыште улшо еҥ чотлан пайлыман. Ик еҥын тылзаш доходшо 15071 теҥге деч шагал гын, Пенсий фондыш тылзе еда тӱлыман выплатылан йодмашым пуаш лиеш.

Ешын доходшылан пашадар, премий, пенсий, социальный пособий, стипендий, тӱрлӧ компенсаций да моло выплате шотлалтыт. Пенсий фондыш йодмашым пуымо годым палемдыме выплате-влакын суммыштым документ дене пенгыдемдыман. Ешын чумыр доходышкыжо чрезвычайный происшествий дене кылдалтше случайлан федеральный бюджет гыч  ойырымо материальный полышын суммыжо, илыме верым сдатлыме да банк депозитын доходышт огыт пуро.

Мут толмашеш, 2018 ий 1 январь марте Марий Эл Республикыште ава (еш) сертификатым 45,5 тӱжем еҥ налын, тиде средствам – 13,6 млрд. утла теҥгем – 23 тӱжем наре еҥ тичмашын кучылтын.

М.ИВАНОВА.

Опубликовать в Одноклассники

Добавить комментарий