Йошкар-Олаште тӱвыра поянлык объектлан да историй ден культур памятниклан шотлалтше эше ик объектым олмыкташ тӱҥалыт. Тиде купеч И.Пчелинын родо-тукымжо Анна Петровна Пчелинан пӧртшӧ. Тудым Изи Какшан серыште 1916 ийыште чоҥымо.
Шукерте огыл кок пачашан тоштемше улак пӧртым реставрироватлаш шонышо у оза лектын. Тудым йыр саварлен налме.
Кызыт тыште «Озаҥ епархийын проектым да реставрацийым ыштыше мастерскойжо» ООО-н пашаеҥже-влак научнын шымлыме, архитектурно-археологический вискалыме, инженерный пашам шуктат. Тудлан эше кодшо ийын республикынан Тӱвыра, печать да калык-влакын пашашт шотышто министерствыже проект документацийым ямдылаш пуэн улмаш. Ты документаций ончыкыжым кугыжаныш историко-культурный экспертизе деч иктешлымашым налшаш. Вара тудым угыч министерствыш келыштараш пуат. Ты объектым закон почеш эше общественный каҥашымашке луктыт.
Р.ЧЕПАКОВА ямдылен
