КУЛЬТУР ДА ИСКУССТВО

Изинек артист койышан кушкын

«И с нами голуби» спектаклан Йоча да самырык-влаклан театр-рӱдерын самырык режиссержо Эрвина Гордеева ден артист-влак 2016 ийыште Олык Ипай лӱмеш кугыжаныш премий дене палемдалтыныт ыле. Нунын коклаште Шернур районысо Мустай ялыште шочын-кушшо да кызыт ешыж дене Йошкар-Олаште илыше Ольга Федотоват уло. Тиде самырык артистын пеҥгыдын йол ӱмбалне шогымыжым ончыкта. Ты амал дене О.Федотова 2 апрельыште, шочмо кечынже, «Кай, кай Йыванлан» спектакль дене бенефисшым эртара. Тушто Оля Майрукын рольжым модеш.

 

— Мемнан пашанам аклымыштлан моткоч кугу тау, — палемда Оля. – Премий самырык-влакым эшеат чолган пашам ышташ кумылаҥда.

О.Федотова изинекак артист шӱлышан кушкын. Икымше классыш кайымыж годым почеламутым лудаш пуэныт улмаш. Йоча-влак шыпрак, нер йымаке ойленыт, а Оля радамын шогышо-влак кокла гыч ик йолтошкалтышлан ончыко лектын, уло йӱкын, раш шергылтарен. Тидын нерген аваже кызытат  чӱчкыдынак ойла.

— Ме классыштына чылан чолга лийынна. Туныктышына Галина Прокофьевна Медведева икымше класс гычак сценылан кумылаҥден: почеламутым лудынна, муренна, куштенна, изирак сценке-влакым модынна. Ик мероприятий мемнан деч посна эртен огыл, манаш лиеш, — палемдыш Ольга.

Школ деч вара санденак тудо И.Палантай лӱмеш культур да искусство колледжысе театр отделенийыш тунемаш пурен. Эше студент улмыж годымак ӱдыр-рвезе-влак дене пырля Марий самырык театрын (театр-рӱдер тунам тыге маналтын) коллективше дене палыме лийын, икмыняр спектакльыште массовкышто модын. «Шем оржан ош поран» спектакльыште ия иге-влакым модмыштым поснак сайын шарна. Пытартыш курсышто тунеммыж годым ты пашам  режиссер семын шындыше Андрей Андрианов ӱдырлан «Ах, водевиль, водевиль» спектакльыште Катерина Ивановна ден Феклан рольыштым ӱшанен.

— Опытан актёр-влак дене ик сценыште модмым кугу пиаллан шотленам. Чонышто тургыжланымаш шижалтын, — ойла О.Федотова.  

Тиддеч вара Оля «Шудо шешке» спектакльыште Оксинам модын. Ты постановко дене Марий Турекыш кок арнялан гастрольышкат миен.

«Грозаште» Феклушан образшымат сайын шарна.

«И с нами голуби»  спектакльым сценыш лукмо моткоч кугу паша. Йоча да ача-ава кокласе кыл сайын почылтеш, шонаш тарата. О.Федотова тушто 12-14 ияш Олян образшым чоҥен. Марий ӱдырлан руш постановкышто тӱҥ рольым модаш куштылгыжак лийын огыл. Нелылыкым сеҥаш туныктышо-влак Галина Николаевна Иванова-Ямаева ден Зинаида Васильевна Долговалан таум ышта.

Мо тугай йочапӧрт? Кудалтен кодымо тулык икшыве. Тудын шинчаончалтышыже могайрак? Самырык артистлан чылажат у лийын. Сандене  Ольга уремысе ньога-влакым ончен, йочапӧртысӧ икшыве-влакын шинчаончалтышыштым интернетыште эскерен.

— Кугурак ӱдыремын изиж годым эмлымверыште кийымат шарналте. Тушто кудалтен кодымо икшыве уло ыле. Тудым ончен, ятыр гана кумылемат тодылалтын. Мом ыштет, ача-авалан изи падыраш кӱлдымыш лектын гын? — кугунрак шӱлалта актрисе.

Спектакльыште Олян образшым устан чоҥыж нерген «Майатул» фестиваль годым жюриште улшо профессионал-влакат сай могыр гыч палемденыт ыле. Ты шотышто Федотова шкежат ӧрын, вет койыш-шоктыш дене тудо пушкыдо кумылан (мутланыме годым шинчавӱд йӧре каласкала — авт.),  тунамак шинчавӱдшат лектеш. Адакшым тиде рольым актрисе кокымшо йоча дене мӧҥгыштӧ шинчымыж годым модаш лектын.

«Ачий, ачием!» спектакльыште Ольга Федотова Светланан рольым модеш. Образыш келгын пурен моштымыжо шукыштым ӧрыктарен.

— Тиде роль койыш-шоктышемланат келша, шонем, — палемдыш театр-рӱдерын актрисыже.

Ур, Пырыс, Рывыж, Мотор ӱдыр, Кугыжа ӱдыр да молат. Шернур кундемын ӱдыржылан йомакыште модаш келша.

Кушташат тудо мастар. Куаным, ойгым, йӧратымашым мут дене каласаш веле огыл, куштымаш гочат ончыкташ, ойлаш шонымо шомакымат капкыл тарватыме дене умылтараш лиеш. Тыгодым Оля  2011 ийыште «Пеледыш лӱман мурызо» спектакльыште куштымыжым порын шарналтыш. 

Кокымшо йоча дене мӧҥгыштӧ шинчымыж годым Ольга Федотова Курчак театрын артистше семынат шкенжым терген ончен. «Кутко сӱан» спектакльын режиссержо Александр Сильвестров (кийыме мландыже пушкыдо лийже — авт.) Олялан Ик куткым да Шудышырчыкым модын ончаш темлен. Йоча дене шинчыше ава уло кумылын нине образыш пурен.

— Икымше гана курчак дене модаш оҥай чучын, но варажым нойымат шижалтын, вет тушто кид вий кая, ик жапыште курчак денат модман, йӱкымат ойлыман, шке планыштат лийман, — ойла Ольга.

Курчак театрын коллективше О.Федотовам сайын вашлийын, спектакль деч вара тудлан паша верымат вашталташ темленыт, но актрисылан шке театр сценыжак лишыл да шерге. 

— Театр — тиде шкешотан куп. Тушко пурымеке, лекташ ок лий. Сценыште модмо годым уто шоныш вуй гыч лектеш, лач тудо тӱня дене илет. Ноет гынат, спектакль деч вара чонышто вий-куат ешаралтмыла чучеш, кумыл кӱза, — мучашлыш шке ойжым О. Федотова.

— Оля  — пашаче кумылан, ответственный актрисе. Чылажымат шот дене ышташ тырша. Иктаж-мо огеш лек гын, ты сомылым эшеат кыртмен ышташ пижеш, кычалеш да садак сеҥымашкыже шуэш. Поро айдеме, молыланат эреак полшаш ямде. А актёрлан тиде моткоч кӱлешан, — О.Федотован пашам ыштымыжым аклыме семын палемдыш Йоча да самырык-влаклан театр-рӱдерын художественный вуйлатышыже Олег Иркабаев.

 

Еш илышыже

Ончыкылык пелашыже Сергей  Якимов дене Ольга Олимпида йолташ ӱдыржӧ деке, Моркыш, унала мийымыж годым палыме лийын.

Сергей  Морко районысо Унчо села гыч. Тунам тудо Казаньысе театрыште  монтировщиклан ыштен. 2006 ийыште ешым чумырымеке, Йошкар-Олаш илаш кусненыт. Пелашыже Республикысе курчак театрыште ты пашамак шукта.  Настя ден Владислава ӱдыр-влакым куштат.

— Коктынат театрыште пашам ыштена. Пелашем кажне гаяк спектакльым ончаш коштеш. Шижам, модмем годым мыйын семынак ойгыра, куана, шортеш.

 

Алевтина Байкова.

(Фотом театр-рӱдерын архивше гыч налме.)

Опубликовать в Одноклассники