Марий Элым вуйлатыше Юрий Зайцев шушаш У ий дене Семёновко школ-интернатын тунемшыже-влакым саламлен. Тудын кӱштымашыже почеш, тений ты тунемме верым олмыкташ республик правительствын резерв фонжо гыч 46,5 миллион теҥгем ойырымо. Тыге тунемме ий гыч йоча-влак уэмдыме школ-интернатыште шинчымашым погаш тӱҥалыт.
Ушештарена, апрельыште школ-интернатын туврашыштыже тул ылыжын, сандене ачалыме пашам ышташ кӱлын. Марий Эл образований да науко министр Лариса Ревуцкаян увертарымыж почеш, ойырымо окса дене оралтын чыла гаяк пӧлемжым шотыш кондымо. Актовый залыште радиатор ден стеклопакетым вераҥдыме, чыла вере электровоштырым да молымат вашталтыме.
Школ-интернатын директоржо Светлана Смолина вашлиймаш годым воспитанник-влакын сеҥымашышт, начарын колшо йоча-влак дене пашам ыштыме йӧн да программе нерген каласкален. Тунемше-шамыч ешартыш образованийым налыт, кажне ийын «Абилимпикс» национальный чемпионатыште шкем ончыктат да тӱрлӧ номинацийыште призан вер дене палемдалтыт.
2023 ий октябрьыште тунемме верын педагогшо-влак «Сквозные образовательные траектории-2023» Россий кӱкшытан проект конкурсышто 300 тӱжем теҥге кугытан грантым сеҥен налыныт. А ИЗО-м туныктышо Игорь Суринов «Российын туныктышо-дефектологшо» V всероссийский конкурсышто абсолютный сеҥыше лийын.
Марий Элым вуйлатыше йоча-влакым саламлымыж деч вара нунылан шере пӧлекым кучыктен да палемден:
– Тиде – эн юзо пайрем. У ий ден Роштолан иктаж-могай шонымашым ушыш пыштыман. Могай пӧлекым налнет але мом ыштынет – Йӱштӧ Кугыза деч йодман. Ӱшанет – чылажат шукталтеш. Республиклан, мылам полшынеда гын, ончыко ончаш, илышлан куана да тунемаш кӱлеш. Тек чыла шонымашда шукталтеш. Пиалан лийза. Тек шӱмыштыда йӧратымаш да порылык илат.
Мучашлан тудо туныктышо, наставник-влакым тыршен пашам ыштымыштлан тауштен да нунылан пеҥгыде тазалыкым, у сеҥымашым тыланен.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
