Марий Эл вуйлатыше Йошкар-Оласе аэропортын чоҥалтше пассажир терминалжын ончен савырнен.
Аэропортын у зданийжын кумдыкшо – 6 тӱжем квадрат метр, терминал ик шагатыште 400 пассажирым обслуживатлен кертеш. Тудо 80%-лан ямде. Чоҥымо паша республикын социально-экономический вияҥмаш индивидуальный программе почеш да инфраструктур бюджет кредитын средстваже кӱшеш шукталтеш.
Марий Эл вуйлатыше Юрий Зайцев самолёт тарваныме зоным, пассажир-влаклан вучымо залым ончен, самолёт шичме-нӧлталтме полосам уэмдыме пашам терген.
Чоҥымо да монтаж пашан тӱҥ ужашыже ышталтын: аэровокзалын зданийжым нӧлтен шындыме, аэропорт йыр улшо кумдыкым тӱзатыме, корным шарыме, вӱдым да шокшым пуышо сетьым шупшмо.
Пассажир терминал зданий кӧргыштӧ подрядчик кызыт туврашым тӧрла, пырдыж панельым да омса-влакым шында. Лишыл жапыште технологий оборудованийым вераҥдаш тӱҥалыт.
Чыла пашам ыштен шуктымек, утларак кугу самолёт-шамыч чоҥештен кӱзен да волен шинчын кертыт. Тидыже пассажир йогыным кугемда да маршрут сетьым кумдаҥда.
Чоҥымо аэропорт да уэмдыме самолёт полоса пассажир-влаклан чоҥештылаш утларак сай йӧным да лӱдыкшымылыкым ышта, регионыш инвестор-влак шукырак толаш тӱҥалыт.
Марий Эл Республикым вуйлатышын пресс-службыжын уверже негызеш
Лидия СЕМЕНОВА ямдылен
Денис Речкинын фотожо/пресс-службо
