УВЕР ЙОГЫН

Туткар лийын огыл…

Россий МЧС-ын республикысе териториальный подсистемыштыже кодшо ийысе паша лектышым иктешленыт да тенийлан паша радамым палемденыт. Марий Элын Антикризисный рӱдерышкыже тыгак исполнительный да верысе кучем орган-влакын вуйлатышыштым ӱжыныт. Заседанийым Марий Эл  Правительстве председательын икымше алмаштышыже Сергей Сметанин вӱден.

 Заседаний тӱҥалме деч ончыч погынышо-влаклан пожарым йӧртымӧ да вӱд объектлаште еҥым утарыме, чрезвычайный ситуаций годым кочкышым шолтымо да ыраш йӧным ыштыме пункт-влакын пашаштым вораҥдарыме   тӱрлӧ йӧн дене палдареныт.

 Мероприятий годым калыкын лӱдыкшыдымылыкшӧ шотышто сайын пашам ыштыше муниципальный образований, эн сай дежурно-диспетчер службо, аралалтме оралте-влак коклаште смотр-конкурсышто ойыртемалтше-влакым палемденыт.

Куанен палемдыман, кодшо ийын республикыште чрезвычайный ситуаций лийын огыл. Кеч пожар чот изишлан кушкын. Но пожарыште да вӱдыш пурен каен колышо-влак шагалрак лийыныт. Кеҥежым кугу чодыра пожарат лийын огыл. 46 гана тул ылыжын, 49,67 гектар кумдык чодыра йӱлен.

Кодшо ийын Россий МЧС-ын Рӱдӧ региональный рӱдерже мемнан республикын управленийжын пашажым терген да сайын ыштыше семын аклен. Идалык мучко чрезвычайный ситуацийлан, сар жапысе условийлан ямде улмым тергыме шотышто икмыняр кугу учений ден тренировко эртеныт. Калыклан уверым намиен шуктымо системат тергалтын.

Козьмодемьянскыште у пожарный подразделенийым ыштымымат сайлан шотлыман. Кугу вер самырык тукымым лӱдыкшыдымылык шотышто шуарымылан ойыралтеш. «Лӱдыкшыдымылык школ» регион-влак кокласе таҥасымаште, тыгак «Самырык утарыше» пасу лагерьыште Марий Элын командыже-влак сеҥыше радамыште лийыныт.  

С.Носова.

Опубликовать в Одноклассники

Добавить комментарий