Республикыштына инвалид-шамычлан пляжный коляске полшымо дене вӱдыштӧ йӱштылаш йӧным ыштыме. 26 июльышто тиде у техникым Марий Элысе Инвалид-влакын всероссийский обществыштын да Шоя-Кузнецово интернат-пӧртын еҥышт Шап ерыште икымше гана тергеныт.
«Демографий» национальный проектын «Кугурак тукым» федеральный проектшым, илалше еҥ ден инвалид-влакым кужу жап ончымо системын пилотный проектшым илышыш пуртымо кышкарыште Марий Элын Калык илышым саемдыме шотышто министерствыже Йошкар-Оласе, Волжск оласе, Оршанке ден Юрино районласе калыкым социально обслуживатлыме комплексный рӱдер-шамыч пеленысе реабилитацийлан кӱлешан технический средствым прокатыш пуымо пунктлашке инвалид коляске, роллятор, каталке, костыль, тоя, ходунок, эҥертен коштмо арвер, шуко жап ик семын кийымылан кӧра коваштын ньыгылген шӱяш тӱҥалмыж деч аралыше матрас ден кӱпчык, ваннысе сиденье, южым тулен овартыме ванне, вургем ден йолчиемым чияш келыштарымаш, ступенькоход-влакым да молымат налын. Чыла тиде инвалид-шамычлан йодмаш, документ да ойпидыш негызеш икмыняр жаплан чылт яра ойыралтеш. Тӧнежын специалистше мо дене кузе пайдаланышашымат радамын умылтара.
Технический средстве-влак кокла гыч поснак министерствын шукерте огыл налме кок пляжный коляскыжым палемдыман. Тудо ошма, шаргӱ, мланде да эсогыл лум ӱмбач куштылгын кудалеш, вӱдыш лывыргын пура да толкыныштыжо шыман лӱҥгалтеш.
– Коляске полшымо дене вӱдышкӧ икымше гана пурышым. Ончычшо изишак лӱдым, но вара тудын ӱшанле улмыжым шижын лыпланышым. Ерыште ийын кошташ моткоч келшыш – нойымем ӱштыл кудалтыме гай ала-кушко йомо, – Шоя-Кузнецово интернат-пӧртыштӧ илыше Александр куанымыжым шылтыде мане.
– Начарын коштшо але йӧршын коштын кертдыме еҥ-влакын мӧҥгӧ гыч лекташ да икте-весе дене мутланаш кумылан улмыштымат сайын умылена, сандене чолга илыш-йӱлам кучаш йӧным прокат пункт полшымо денат ыштена, – палемдыш регионысо калык илышым саемдыме шотышто министрын алмаштышыже Дмитрий Солдатов.
– Вӱдыш начар тазалыкан кажне еҥак огыл пураш тоштеш. Лӱдмӧ шот садак уло. А тиде аппарат – пеш чапле арвер. Тудын полшымыж дене ерыште ийын коштшо-влак куатышт пурымым шижыт да шканышт утларак ӱшанаш тӱҥалыт. Тидын дене физический ден психологический состоянийыштат сай велыш вашталтеш, – рашемдыш Шоя-Кузнецово интернат-пӧртыштӧ эмлыме-физкультур комплексын инструкторжылан да массажистлан ыштыше Сергей Сурский.
Йошкар-Оласе калыкым социально обслуживатлыме комплексный рӱдерын директоржо Эльвира Кропотован палемдымыж почеш, тыгай коляскым моло технический средстве семынак чыла инвалид документ дене келшышын эсогыл куд тылзылан налын кертеш.
М.ИВАНОВА
Фотом Марий Элысе Инвалид-влакын всероссийский обществыштын регионысо пӧлкаштын ВК соцкылысе группыж гыч налме
