Россий Банкын Йошкар-Оласе тоштерже шкеж деке унала ӱжеш.
Тушто экскурсийым чылаштлан эртарат. «Россий Банкын историйже 160 ий наре погына. Мемнан экспозиций элыште да Марий Элыште окса пашан кузе вораҥмыж дене палдара. Республикыште тудлан тӱҥалтышым Кугыжаныш Банкын Озаҥ конторжын Кокшайскысе агентствыже ыштен», – каласкала Россий Банкын Юл-Виче кугыжаныш учрежденийжын Марий Элысе национальный банк-пӧлкажым вуйлатышын алмаштышыже Светлана Фокша. Тоштерыште элыште кагаз окса кузе вашталт толмым пален налаш, ончычсо оксам, шотлышо техникым, банк пашаеҥын тошто формыжым да молымат ужаш лиеш.
Тоштерыш ончылгоч 8 (8362) 68-14-47 телефон гоч возалтын гына логалаш лиеш. Кодшо ийын тушто 150 экскурсийым эртареныт.
С.Носова
