УВЕР ЙОГЫН

Газ кӱлеш – ойпидышым ыште

    Тений шошым да кеҥежым мыйын илыме шуко пачеран пӧртым тӱрыс олмыктымо годым газовик-влак, газпучым вашталтышыштла, газым пуаш да оборудованийым технически обслуживатлаш договорым угыч ышташ кӱлмӧ нерген ушештареныт ыле. Тыгак ыштышым да кызыт ласкан илем. Газ пашаеҥ толын терген кайыш — чылажат сай.

Туге гынат республикыште илыше икмыняр тӱжем еҥ тӱрлӧ амаллан кӧра специализироватлыме компаний дене тидым ышташ кызыт мартеат кӱлешлан шотлен огыл. Тугеже газовик-влак газ приборын кучылташ йӧрмыжым але укежым огыт пале. А вет статистикым шотыш налаш гын, тергыдыме да тӧрлыдымӧ газ оборудований — азапыш шуктышо ик тӱҥ амал. Эшеже, закон дене келшышын, техобслуживанийым ышташ тореш лийше-вдакым наказаний вуча: иканаште газым пуымым чарнен да штрафым тӱлыктен кертыт.

Кеҥежым газым пуышо «Йошкар-Ола газпром межрегионгаз» организаций, техобслуживанийлан договорым ышташ кӱлмӧ нерген шижтарен, тӱжем утла увертарымашым колтен. Да шижтарен: кӧ ок ыште, газ деч посна кодеш. Южыжо тидым шотыш налын да договорым ыштен, а молыштлан газым петыраш толшо газовик-влак бригадым гына вучашышт, тыгак штрафым тӱлаш оксам ямдылашышт веле кодеш.

А.АНДРЕЕВ.

Опубликовать в Одноклассники

Добавить комментарий