Шуко моло вере семынак республикысе Наказанийым шуктышо управленийын чыла учрежденийыштыже Сеҥымаш кечылан пӧлеклалтше мероприятий-влак эртаралтыныт.
Исправительный учрежденийлаште тудын вашеш сӱрет, плакат, пырдыжгазет конкурс, спорт таҥасымаш-влак лийыныт, эрык деч посна кодшо-влаклан сар дене кылдалтше фильм-шамычым ончыктеныт. Торжественный митинглашке судитлыме-влак кокла гыч ятырынже Кугу Отечественный сарыште кредалше родыштын фотографийышт дене миеныт. Воспитательный службо пашаеҥ-влак патриотизм шӱлышан мероприятийлам эртареныт.
7-ше №-ан колоний-поселенийын театр-студийже «А зори здесь тихие» спектакльым ямдылен. Тудым шкешт дене веле огыл, тыгак чыла исправительный колонийыште ончыктеныт.
9 май чыла учрежденийыште пайрем концерт дене мучашлалтын.
Йоча сӱрет конкурс нерген радамлынрак палдараш гын, тушко ведомствын чыла подразделенийыштыже тыршыше-влакын 6 гыч 15 ияш марте 46 икшывышт ушнен.
Ӱдыр-рвезе-влакын 50 наре пашашт гыч оргкомитет эн сай семын 18 сӱретым ойырен налын.
8 ияш марте ийготан-влак тӱшкаште Глеб Ефимов, Андрей Сергеев да Глеб Обухов сеҥышыш лектыныт.
9-11 ияш-влак коклаште комиссий Тимур Соловьевым палемден.
12-15 ияш-влак ӱдыр-рвезе-влак коклаште Яна Малышева ден Екатерина Петрован сӱретыштым эн сайлан шотленыт, палдара республикысе УФСИН-ын пресс-службыжо.
Л.Камалетдинова
А.Канатеевын фотожо
