УВЕР ЙОГЫН

Марий юмыйӱла ушемлан — полыш

Марий Эл Республик вуйлатыше А.Евстифеев марий юмыйӱла ушемын енже-влак дене вашлийын.

Регион вуйлатыше республикыште калык ден конфессий-влак коклаште ваш келшен илымылан кугу тӱткышым ойырымым палемден.

«Пандемийлан кӧра ме тендан дене кодшо ийын вашлийын кертын огынал, но тиде тӱрлӧ йодыш шотышто икойыш шуын пашам ыштымылан чаракым ыштен огыл. Тылеч ончычсо вашлиймаш-влак почеш Марий юмыйӱла ушемын пашаж дене кылдалтше кӱштымашем шукталтынак толыныт», – каласен А.Евстифеев. Вара тудо поснак чолга онаеҥ-влакым  палемден. Тыге, Марий Эл вуйлатышын Тауштымашыжым Марий юмыйӱла ушемын У Торьял районысо общиныжым вуйлатыше Владимир Богачевлан, Советский районысо общиным вуйлатыше Герман Милютинлан,  Кужэҥер районысо общиным вуйлатыше Альберт Рукавишниковлан кучыктен.

 Умбакыже мутланымаш чайым йӱмӧ годым шуйнен. Марий юмыйӱла ушемын онаеҥже-влак регион вуйлатышылан чодыра пожарым писын йӧрташ полшышо пунчал-влакым лукмыжлан тауштеныт.

 Вашлиймаш почеш А.Евстифеев тыгак у кӱштымаш-влакым ыштен. Мутлан, республикын Образований да науко министерствыжлан Марий юмыйӱла ушем дене пырля «Марий калык йӱла» предметлан программым ямдылыме да марий юмыйӱлан негызше нерген модульым «Религиозный тӱвыра-влакын да светский этикын  негызышт» дисциплиныш пуртымо  йодышым пырля каҥашаш.

Тӱвыра, савыктыш да калык паша шотышто министерствылан муниципальный район ден оласе округлаште Марий юмыйӱла ушем дене пырля юмыйула ушем дене палдарыше тоштер экспонат-влакым шукемдаш кӱштымашат лийын. Тыгак Тӱвыра, савыктыш да калык паша шотышто министерствылан юмыйӱла ушемлан посна пӧлемым ойыраш  да организаций нерген посна монографийым лукташ ӱшаныме. Ты министерствак Марий Турек районышто  «Марий пӧрт» тоштер-пӧрт пелен тоштер-этнографий комплексым да апшаткудым ыштышаш улыт. Волжский районысо администраций ты районышто Чодраял воктенысе кӱсотым тӱзатышаш да тудлан паспортым ыштышаш. А Молодежный политике, спорт да туризм министерстве Марий юмыйӱла ушем дене пырля паломник ден турист-шамычлан маршрут-влакым ямдылышаш.

 Марий Эл вуйлатышын организаций да аналитике виктемжын уверже негызеш С.Носова ямдылен.

Опубликовать в Одноклассники

Добавить комментарий