Кызытеш – 29-ше верыште
«Российын олаже. Калык сайлымаш» всероссийский конкурсышто Йошкар-Олана кызытеш рейтинг почеш 29-ше верыште. Марий рӱдола верч 2668 еҥ йӱкшым пуэн.
Икымше верыште – Владивосток, чылаже 84,5 тӱжем йӱкым поген. Юл кундем федерал округ гыч ныл ола – Уфа, Самара, Саранск да Пенза – ончылно улшо лу ола коклаш логалын. Эн шагал (84) йӱкым Нарьян-Мар поген.
Ушештарена, «Российын олаже. Калык сайлымаш» конкурс 2012 ий гыч эртаралтеш. Лу ий ончыч конкурсыш 81 ола ушнен, Йошкар-Ола тунам 20-шо верыш лектын. 2015 ийыште рӱдолана 74040 йӱкым поген да 6-шо верым налын. Индеш ий жапыште тиде эн сай сеҥымаш лийын. А теве кодшо ийын, чаманаш логалеш, Йошкар-Ола 45-ше верым гына налын. Тений таҥасымашке 83 ола ушнен. Йӱклымаш 2022 ий 31 декабрь марте шуйна, тугеже йӧратыме рӱдолана верч йӱклаш жап эше уло.
Л.СЕМЕНОВА
Фотом интернет гыч налме
