7-ше номеран исправительный колонийыште Кугу Отечественный сарлан пӧлеклалтше исторический экспозицийым почыныт.
Тушто военный атрибутике, обмундирований, энциклопедий, книга, фотографий, шарнымаш-влак … – чылаже 40 утла экспонат ончыкталтын, палдара Марий Элысе УФСИН-ын пресс-службыжо. Мо оҥайже, южыжым осужденный-шамыч шкешт ямдыленыт. Мутлан, «Родина-мать зовёт!» скульптурын иземдыме копийжым. Тудак выставкын рӱдыжлан шотлалтеш. Тиде скульптурым да икмыняр моло экспонатым ӱдырамаш-осужденный-шамыч колонийысе прикладной творчестве кружокын занятийлаштыже ыштеныт. Тыгак ты учрежденийыште тыршыше-влакат ончерым чумырымашке ушненыт.
Исторический экспозицийым колонийын ик отрядыштыже 9 майыште Сеҥымаш кечын торжественно почыныт. Тылеч вара тыште кугу пайрем вашеш эртыше «Навстречу Великой Победе!» художественный самодеятельность смотр-конкурсышто сеҥыше-влакын гала-концертышт лийын.
А Сеҥымаш кечылан пӧлеклалтше творческий конкурс, смотр, викторине, моло мероприятий республикысе чыла исправительный учрежденийыште эртеныт.
Л.КАМАЛЕТДИНОВА
А.Канатеевын фотожо
