Йӱла почеш 12 июльышто Морко районысо Унчо села воктенысе Мер отышто кажне ийын Сӱрем кумалтыш лиеш.
Теният тушко тиде кундемыште илыше да республикнан тӱрлӧ районлаже гыч Пӱртӱс Юмылан ӱшаныше, тыгак Марий самырык тукым слётын участникше-влак погыненыт. Унчо велын йӱла ойыртемже дене палыме лияш Эстоний, Финляндий, Швейцарий элла, Иваново область гыч уна-влакат толыныт.
Кумалтыш мийыше-влаклан вич тулолмо дене эртен: Ош Кугу Юмылан, Шочын Авалан, Тӱнямбал Серлагышлан, Миколо Юмылан, Кугарня Юмылан.
— Кумалтышыште молгунамсе семынак Марий Элын тӱҥ онаеҥже Александр Иванович Таныгин да республикысе юмыйӱла ушемын еҥже-влакат лийыныт, — палемдыш Унчо этно-культур комплекс вуйлатыше Алексей Иванов. — Надыр шотеш вольыкым«Передовик» ялозанлык артель пуэн. Тиддеч посна ялысе калык межаным, шулдыраным конденыт, талгыдат лийын.
Отыш мийыше-влакын ойлымышт почеш, тиде кечын эрдене изирак йӱр йӱрын, а Юмылан пелешташ тӱҥалмеке, шем кава шеҥгеч чевер кече куанен шыргыжын.
— Кумалтышым эртарен колташ проект окса мыняр-гынат полшыш. Шийвундо дене ме куд подым налынна, Мер отыш толшо-влаклан стендым ямдыленна. Туштыжо кумалтышын радамже дене палдаренна, кӱсотышто шкем чын кучымо нерген возенна. Стендым отыш пурымашке вераҥденна, — ешарыш Алексей.
А.Байкова
А.Титовын да А.Ивановын фотожо
