УВЕР ЙОГЫН

Тукым-влак вашлийышт манын

14 июльышто Марий Эл уголовно-исполнительный системын ветеранже-влаклан памятникым официально почыныт.

Тиде изирак мемориал комплекс Йошкар-Олаште Строитель уремыште республикысе УФСИН оралте воктене верланен.

Тудым ышташ оксам кызытсе пашаеҥ-влак веле огыл, УИС-ыште ончыч тыршыше-влакат ойыреныт.

Памятник шеҥгелне флагшток верланен, мемориал комплексым тул дене волгалтарыме, теҥгылым шындыме.

Тудым почмо годым республикысе УФСИН начальник Сергей Евтушенко мутым ойлен, тыгак республикысе ветеран-влак ушемын эн чолга еҥже-влакым палемденыт.

Памятник ӱмбач шартышым ушем председатель Рудольф Григорьев кораҥден. Мут толмашеш, икмыняр кече ончыч республик вуйлатыше Александр Евстифеев тудым «За заслуги перед Марий Эл» орденын медальже дене наградитлыме нерген указыш кидпалыжым пыштен.

Тиде мероприятийыш чумыргышо-влаклан пытартышлан изирак концерт лийын. Тудым ведомствын пашаеҥже ден нунын икшывышт ончыктеныт. УИС вуйлатыше шкежат икмыняр мурым йоҥгалтарен.

А стеле воктене «Тукым-влак вашлиймаш» фотоончерым вераҥдыме. Лач тыгай вашлиймаш-влакланак тиде мемориал комплекс ышталтын, палдара республикысе УФСИН-ын пресс-службыжо.

Л.КАМАЛЕТДИНОВА

Опубликовать в Одноклассники

Добавить комментарий