Кодшо ий ноябрьыште «Марий Эл Республикын кокла медицине пашаеҥже-влакын ассоциацийышт» мер организаций Россий Президентын грантшым сеҥен налын ыле. Тыге, 2018 ий январь гыч Сарын ветеранже-влакын республикысе госпитальыштышт «НужнаЯ помощь» проект пашам ышташ тӱҥалын. Таче тудым иктешлашат лиеш.
Чот черле илалше еҥ тазалыкшым пеҥгыдемден кертмылан ӱшанжым йомдара гаяк: сай ончыкылыкым ок ужат, эсогыл вес тӱняшке вончаш ямдылалтеш…
Эмлыме процесс кышкарыште вуйдорыкышто вӱр коштмо пашан пужлымыж, миокардын инфарктше дене орланыше-влакын когнитивно-поведенческий манме реакцийышт тичмашын огеш тӧрлане.
«НужнаЯ помощь» проект пациентлан шкан акым шындаш йӧным ыштен. Тудын туныктымо принципше-влак илалше тукымлан шуко пайдам пуэныт. Проектын участникше-шамыч чыла занятийыш стационарыште эмлалтмышт годым веле огыл, мӧҥгышкышт пӧртылмышт деч варат кумылын коштыныт.
«Те пеш кугу да кӱлешан пашам ыштеда. Шоҥгемме да самырык-влаклан нелыт лийме йӧршынат ок шу. Вуйушым, вийым кужу жаплан арален кодымо шуэш. А тендан занятийда, проектда полшымо дене тыгакак лийшаш», – маныт вате-марий Подоплеловмыт.
«Тыгай оҥай, уста да пайдале проектыште участвоватлымемлан нимучашдымын куаненам. Ӱдыр-шамыч, те просто молодец улыда! Те илышым йӧршын вес семын ончаш туныктышда», – таушта А.Юфьерева.
«Сарын ветеранже-влакын госпитальыштышт икымше гана огыл эмлалтам да кажне ганажат чот ӧрам – илалше-шамычлан медицине полышым пуымо йӧн кузе чот саемын толеш! «НужнаЯ помощь» проектыште мыланем поснак кидын тыгыде моторикыжым вияҥдыме занятий келшыш, вет ийготым погымо семын кидварня шижмым чарна да лывыргылыкшым йомдара. Занятий веле огыл, нуным эртарыше пашаеҥ-влакат моткоч поро улыт. Тек чыланат таза лийыт», – тылана В.Попенко.
«Занятийыш кажне кечын куанен коштам, кажне ганажат тазалыкемлан могай-гынат пайдам налам», – палемда Ю.Блинов.
Иктешлымаш яра мут гыч огыл, тудым проектын участникше-влак ыштеныт. Тугеже медик-влакын илалше тукымын тазалыкше верч тыршымышт арам лийын огыл.
М.ИВАНОВА.
