Йырым-йырысе средам аралыме тӱнямбал кечын Юл кундем кугыжаныш технолгический университетыште кокымшо ий почела Российыште экологын кечыжлан пӧлеклалтше торжественный мероприятий эртен.
Тудын организаторжо — Марий Элын Пӱртӱс поянлык, экологий да йырым-йырысе средам аралыме министерствыже.
Саламлыме шомакым Марий Эл Правительстве председательын алмаштышыже Юрий Сидыганов, пӱртӱс поянлык, экологий да йырым-йырысе средам аралыме министр Владимир Шутов да молат ойленыт. Нуно йырым-йырысе средам аралыме пашаште тыршен ойыртемалтше-влаклан тӱрлӧ ведомственный наградым кучыктеныт. Мутлан, Звенигово район Красногорский посёлкысо кокымшо номеран школын экологический агитбригадыже «Марий Эл пӱртӱсын эн сайын аралышыже-влак» куснылшо кубокым сеҥен налын.
Пайрем концерт номерла деч посна эше кок событий дене шарнымашеш кодын. Университетын экологий, почвоведений да пӱртӱс дене пайдаланыме кафедржым вуйлатыше Евгений Гончаров Марий Элын эколого- географический атласшын проектше дене палдарен. Вес событийжылан Пӱртӱс поянлык, экологий да йырым-йырысе средам аралыме министерстве ден Юл кундем кугыжаныш технологический университет коклаште ваш келшен пашам ыштыме шотышто ойпидышым пеҥгыдемдымым шотлыман.
С.Носова.
