Республикысе медицине пашаеҥ-шамычлан COVID-19 дене кучедалаш ординатор ден студент-влак полшат.
Эртыше арнян регионнан медицине организацийлашкыже 66 ординатор ден элнан вузлаштыже, тыгак Йошкар-Оласе медицине колледжыште шинчымашым погышо студент-влакым колтымо. Нунын кокла гыч 35 еҥ пашам ышта, 13 – практикыште, 18 – волонтёр.
Казань кугыжаныш медицине университет гыч 15 студент толын, Киров кугыжаныш медицине университет гыч – 3, И.Н.Ульянов лӱмеш Чуваш кугыжаныш университет гыч – 2, Марий кугыжаныш университет гыч – 28.
COVID-19 дене инфицироватлалтше черле-влакым эмлыше Йошкар-Оласе больницыште, Йоча республиканский клинический больницыште, Волжск оласе рӱдӧ больницыште да Марий Турек районысо рӱдӧ больницыште 4 ординатор (врач ден кокла медицине пашаеҥ) ден 10 студент (кокла да изирак медперсонал) тыршат.
МарГУ-н 6 студентше Вашке полышым пуымо службын медицине пашаеҥже-влаклан полшаш ушнен.
Йошкар-Оласе медицине колледжын кугурак курслаштыже тунемше-ӱдыр-рвезе-шамыч Йошкар-Оласе йоча больницыште, 1-ше №-ан поликлиникыште, 1-ше №-ан медико-санитарный частьыште, Козьмодемьянск район-влак кокласе, Звенигово да Медведево районласе рӱдӧ больницылаште волонтёр семын пашам ыштат.
Тиде арнян республикысе эмлымверлаште тыршыше медицине пашаеҥ-влаклан МарГУ-н эше 35 студентше полшаш ушнышаш.
М.ИВАНОВА
