Марий Элым вуйлатыше Запорожье область гыч йоча-влак дене вашлийын.
Палемдыме кундем гыч толшо икшыве-шамычын Яльчик ерыште верланыше «Молодость» лагерьыште канымышт да тазалыкым пеҥгыдемдымышт нерген увертаренна ыле. Тиде кечылаште смене мучашлалтын.
Юрий Зайцев дене вашлиймаш чайым йӱмӧ годым лийын. «Ме пырля ик эл улына. Марий Эл – тенданат пӧртда. Мемнан кундем мотор, яндар ер-влаклан поян. Ончыкыжымат унала вучена. Мӧҥгышкӧ пӧртылмӧ корныда сайын эртыже. Мемнан дене тыланда келшен да тыште ӱшанле йолташ-шамычым муында манын ӱшанем», – каласен тудо.
Йоча-влакат канымышт шотышто шонымашыштым ойленыт, кушеч улмышт нерген каласкаленыт. «Тышеч кайыме ок шу, но тыгодымак чон мӧҥгыш шупшеш», – маныныт.
Вашлиймаш мучаште регионым вуйлатыше нунылан шушаш 1 сентябрь вашеш пӧлекым кучыктен.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
