Медведево посёлкысо Г.Г.Гибадуллин лӱмеш мини-зоопарк пеленысе кумдыкым тӱзаташ палемдыме.
Тидын нерген «Медведево – развиваем посёлок вместе» воткыл лаштыкыште увертаралтеш. Медведево муниципал район администрацийын увертарымыж почеш, тений посёлко изирак олалаште да исторический илемлаште оласе йырвелым йӧнаным ыштыме эн сай проектлан всероссийский конкурсыш ушна. Тудым Российын Чоҥымо паша да илыме-коммунал озанлык министерствыже эртара. Конкурсышто сеҥымаш федерал грант шийвундым конден кертеш. А тудым лачшымак изи-зоопарк воктенысе кумдыкым тӱзаташ кучылташ палемдыме. Ввоткыл тӱшкажымат чолга еҥ-влакын темлымаштым пален налаш манын ыштыме.
Шукерте огыл зоопарк кумдыкым тӱзатыме шотыштак районысо да посёлко администрацийын, тӱвыра, образований да спорт учреждений-влакын, молодёжный парламентын, «Небо» проект студийын еҥышт, предприниматель-влак пырля погыненыт. Воткыл тӱшкаш ушнышо-шамычын темлымашыштым шотыш налын, погынымаште зоопарк кумдыкышто кафем ышташ, искусственный пӱян сержым пеҥгыдемдаш, вӱдым эрыктыме фильтрым келыштараш, мероприятий-влакым эртараш посна зоным, пандусым, у аттракцион-влакым вераҥдаш, ешартыш электротулым шупшаш палемденыт.
Снимкыште: зоопаркыш пурымо мотор кӱвар.
Фотом Медведево районысо «Вести» газет редакцийын воткыл лаштыкше гыч налме.
