Марий Элым вуйлатышын пашажым жаплан шуктышо Юрий Зайцев Волжский районысо фермер-влаклан полшаш сӧрен.
26 июльышто Ю.Зайцев Волжский районыш миен коштмыж годым кресаньык-фермер озанлыклаште лийын.
Иктыже Пӧтъялыште верланен, тушто фермер Валериян Семенов ынде икмыняр ий пырчан культур ден пакчасаскам ончен кушта. Мутшо почеш, пытартыш ийлаште озанлык палынак сайын вияҥеш, тыштыже кугыжаныш полышат шӱкалтышым ышта. Тений В.Семенов 4 миллион теҥгеаш грантым сеҥен налын. Ойырымо окса дене мландым обработатлыме, кушкылым шындыме, пырчым аралыме техникым налын конден. Тиде фермер озанлыклан эше 308 тӱжем теҥгем кушкылым ончен кушташ ойырымо.
«Кызыт 1000 гектар наре мландым обрабатыватлена. Шурным налше-шамыч ий еда шукемыт. Тудым сурткайык фабрикылашке, кугу ялозанлык предприятийлашке колтена», – палдарен В.Семенов.
«Шурным налыт гын, тугеже республикын ялозанлык предприятийже пашажым кумдаҥда, тиде сай тенденций», – манын Ю.Зайцев да Валериян Семёновлан чолга илыш корнышто улмыжлан, пайдаланыдыме мландым оборотыш налме кӱлешан пашам шуктымыжлан, шочмо кундемым вияҥдымаште надырым пыштымыжлан тауштен.
4 миллион теҥге кугыт грант полышым налше вес фермер – Учимсола ял гыч Андрей Пушкин. Тудо ковыштам, киярым, помидорым ончен кушта. Грант оксам пареҥгым ончен куштымо пашам кумдаҥдаш кучылтын. Мут толмашеш, тӱҥ шотышто шкенан элыште ыштен лукмо технике дене пайдалана.
«Ме пареҥгым фасоватлыме комплекс ден приемный бункерым налына. Оборудованийым 15 сентябрь марте конден шуктат», – увертарен А.Пушкин.
Фермерын продукцийжым республикысе калык веле огыл, пошкудо регионлаште илыше-шамычат кумылын налыт. Москва ден Москва областьышкат наҥгаят. Кызыт сатулымо кугу сеть-влак дене пашам ышташ палемдат.
Ю.Зайцев Андрей Пушкинын пашам йӧратымыжым, шонымашке шуаш тыршымыжым палемден да продукцийжым тамлен ончен.
«Сай лектышым тыланем. Озанлыкда тек вияҥеш. Мо мемнан дене кылдалтын гын, грант, финансирований, ме обязательно полшена», – сӧрен тудо да тыгай чолга фермер-влакын тыршымышт дене республикын ялозанлыкше ончыкыжым палынак сайын вияҥын кертеш манын.
* * *
Юрий Зайцев федеральный кӱлешлыкан А-295 «Йошкар-Ола – Зеленодольск» автомобиль корнын ик кутышыжым капитально олмыктымо пашамат терген.
Тиде – Кичиер посёлко воктенысе кугорнын 8 километр кутышан участкыже. Пашан акше – 844 миллион теҥге. 6 километр кутышышто асфальтым уже пыштыме. Корным олмыктымо паша график деч ончыч шукталтеш, да тиде кумдык октябрь марте ямде лиеш.
Республикын транспорт да корно озанлык министрже Александр Герасименкон Ю.Зайцевлан ушештарымыж почеш, автомобиль корнын тиде ужашыжым аварийым иземдыме шот дене кумдаҥдыме да ныл полосаным ыштыме. Регионым вуйлатыше тидым чын пунчал семын палемден.
Корным олмыктымо деч посна йолешке вончымо ужашыште стационар электроволгыдым пуышо устройствым шогалтат, тыгак тӱшка транспорт шогалме верым ыштат, увертарен подряд организацийын вуйлатышыже.
Ю.Зайцев трассыште шуко автомашинан кудалыштмыжым палемден да, тидым шотыш налын, пашан шырымжым иземдыде, транспортлан утыжым чарныде кудал эрташ йӧным ышташ темлен.
* * *
Волжский районышто кугу инвестиционный проектым илышыш пуртат.
Юрий Зайцев Приволжский посёлкыштат лийын. Тушто кызыт «Акашевский» сурткайык фабрикын комбикорма заводшым уэмден олмыктымо шотышто инвестиционный проектым илышыш пуртат.
Проектын акше – 769 миллион теҥге. Ончылгоч палемдыме почеш, завод 2023 ийын I кварталыштыже пашам ышташ тӱҥалшаш. Тыште кызыт 1-2 радам репродуктор-влаклан идалыкыште 80 тӱжем тонн кормам ямдылен кертше куатан ешартыш линийым шындат.
Ю.Зайцев лабораторийым, производственный корпусым да операторскийым ончен, вуйлатыше да пашаеҥ-влак дене мутланен.
«Акашевский» сурткайык фабрикын исполнительный директоржо Денис Гузевын каласкалымыж гыч, тений чумыржо 2,5 миллиард теҥгеаш эше ик инвестиционный проектым илышыш пурташ тӱҥалыт. Тиде районыштак верланыше Карай ял воктене идалыкыште 28,6 миллион штук инкубационный муным пуышо 2-шо радам репродукторым чоҥаш палемденыт. Проектым 2024 ий I кварталыште мучашлаш шонат. Тыге сурткайык фабрикыште идалыкыште чылаже 160 миллион штук инкубационный муным налыт. Тылеч посна проект эше 130 еҥлан у паша верым пуа.
«Инвестиционный проект-влак Марий Эллан моткочак кӱлешан улыт. Сурткайык фабрикын кузерак вияҥмыжым ужым. Тыгай промышленный предприятий-шамыч регионлан веле огыл, а чумыр эллан продовольствийым ситарат, у паша верым пуат, ялым вияҥдат», – палемден Юрий Зайцев.
* * *
Сентябрь гыч Приволжский посёлкышто илыше-влак сай вӱдым йӱаш тӱҥалыт.
Тиде жаплан тыште кызыт улшо чыла вӱд пучым иктыш ушышо водозабор пашам ышташ тӱҥалеш. Тудо суткаште 1000 кубометр вӱдым пуэн кертше куатан лиеш. Объектын акше – 83 миллион теҥге.
Волжский районыш миен коштмыж годым Марий Элым вуйлатышын пашажым жаплан шуктышо Юрий Зайцев водозаборым чоҥымо шырымым терген да тиде объектын районлан моткочак кӱлмыжым палемден. Калык вӱдын ситыдымыжлан да начар качестван улмыжлан вуйым шиеш. Водозабор тиде ситыдымашым кораҥдышаш.
Кызыт объект 95 процентлан ямде, сандене тудым жапыштыже чоҥен шуктыдымо шотышто лӱдыкшӧ уке.
Волжский районым вуйлатыше-влакын ӱшандарымышт почеш, объект Приволжский посёлкышто илыше калыклан СанПин-ын йодмашыжлан келшен толшо йӱшаш вӱдым ситышын пуышаш.
Татарстан Республикын Инженер сеть-влакым капитально олмыктымо да энергийым аныклыше технологийлам вияҥдыме виктемжын тӱҥ инженерже Зульфат Гимадаевын увертарымыж почеш, паша «Яндар вӱд» регионысо проектым илышыш пуртымо кышкарыште шукталтеш. Проект дене келшышын, кок таве ден кок резервуаран вӱдым ямдылыме станцийым чоҥаш палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
