Юрий Зайцев: «2023 ийыште Марий Элыште экономикын ятыр отрасльже палемдымым ончылтен кушкын»
5 мартыште Марий Эл Кугыжаныш Погынын нылле кумшо сессийыштыже регионым вуйлатыше Юрий Зайцев республик правительствын 2023 ийыште ыштыме паша лектышыж нерген отчётым ыштен.
2023 ийыште Марий Элыште экономике ден социальный сферлан сай велыш кушкаш йӧным ыштыме, бюджетым шке доход дене пойдарыме ужашым кугемдыме, калыкын илышыже саемдыме, палемден Ю.Зайцев.
«Промышленный производство 14,1 процентлан кушкын, тиде показатель дене ме Россий Федерацийын икымше лу регионжо коклашке логалынна да Юл кундем федеральный округышто кокымшо верыш лектынна. 2022 ий дене таҥастарымаште ӱмаште 23,1 процентлан шукырак илыме верым регистрироватлыме, тиде показатель дене ме ПФО-што икымше верыште улына. Чоҥымо отрасль тичмаш налмаште 21,7 процентлан кушкын», – увертарен республикым вуйлатыше.
Ю.Зайцевын палемдымыж почеш, регионым Россий Федерацийын президентше Владимир Путинын тӱҥалме национальный проектше-влак вияҥдаш полшат.
«Регионышто национальный проект-влакым илышыш пурташ 2019 ий гыч 58 миллиард утла теҥгем колтымо. 2023 ийыште Марий Эл 12 национальный проектыште чолган участвоватлен. Нунын полшымышт дене 98 мероприятийым шуктымо, ты шотыштак социально кӱлешан 23 объектым чоҥымо да уэмден олмыктымо. Республик национальный проект-влакым шуктымо шотышто Российын эн сай регионжо-шамыч коклашке пурен», – манын Юрий Зайцев.
Регионым вуйлатыше республикын правительствыжлан Россий президентын увертарыме «Еш», «Российын молодёжьшо», «Кадр», «Данный-влак экономике», «Кужу да чолга илыш» у нацпроект-шамычын кышкарыштышт мероприятий-влакым илышыш пуртышашлан средстван кугытшым палемдаш кӱштен.
Республикым социально-экономически вияҥдыме индивидуальный программе дене 268 у паша верым ыштыме, кок миллиард утла теҥгеаш бюджет деч ӧрдыжысӧ инвестицийым кондымо, капитально чоҥымо кум объектым пашаш колтымо, ешарен Ю.Зайцев.
Республикым вуйлатыше 2023 ий октябрьыште Россий Федераций Федеральный Погынын Федераций Советыштыже Марий Элын кечыжым пайдалын эртарымым палемден. Федераций Советын пунчалже дене кӱлешанлан шотлалтше 20 мероприятийым илышыш пурташ темлыме, нунылан федеральный бюджет гыч 63,1 миллиард теҥгем ойыраш палемдыме.
Ю.Зайцев специальный военный операцийын участникше-влак ден нунын ешыштлан полшымо йодышышто посна шогалын. Республикыште регионын бюджетше кӱшеш социально полшымо 49 мере ышталтеш, 2023 ийыште 600 миллион утла теҥгеаш социальный полышым пуымо. 2023 ий 15 ноябрь гыч ойпидышым шке кумылын ыштыше граждан-влаклан ик гана тӱлыман выплатын кугытшым 100 тӱжем теҥге гыч 250 тӱжем теҥге марте кугемдыме. Боевой действий-влакын участникыштын ешыштлан полыш ончыкыжат лиеш, палемден Юрий Зайцев.
Правительствын пашаштыже Запорожский областьысе Куйбышев районлан полыш тӱҥ направленийлан шотлалтеш. Социально кӱлешан кандаш объектыште аварийым кораҥдыме, шотыш кондымо пашам шуктымо, йоча-влаклан Марий Элыште канаш йӧным ыштыме, шефствыш налме регионышто илыше калыкын тазалыкшым тергаш медик-влакым колтымо, гуманитар полышым наҥгайыме.
Марий Элын правительствыже Россий президентын вияҥме национальный цельыш шуаш шындыме задачыже-влакым шуктымо пашам умбакыжат тыршен ышташ тӱҥалеш, Кугыжаныш Погын ончылно отчётым мучашлыме годым палемден Юрий Зайцев.
«Российын президентше Владимир Владимирович Путин Федеральный Погынлан ыштыме посланийыштыже элым лишыл куд ийыште вияҥдыме кугу программым палемден. Мутшо почеш, элна ончылно шогышо исторический вызов-влакын кугытышт кугыжаныш, граждан-влак, бизнес деч моткочак чатка да раш, иквереш шуктымо пашам йодыт», – манын Юрий Зайцев.
Марий Элым вуйлатышын пресс-службыжын уверже негызеш М.ИВАНОВА ямдылен
Д.Речкинын фотожо/ «Марий Эл» увер агентстве
