Регион вуйлатыше тале спортсмен, Российын спорт мастерже автогонщик Николай Калинин дене вашлийын.
Вашлиймаште Юрий Зайцев республике спортсменын результатше дене кугешна, тудын сеҥымашыже самырык тукымым таза илыш-йӱлалан кумылаҥда манын палемден.
Марий Элын сборныйжо дене пырля Николай Калинин пытартыш кум ийыште шагал огыл сеҥышыш лектын. 2023 ийыште Российын чемпионатыштыже (кольцевой гонко) ший призёр, ӱмаште Российын кубокшо верч таҥасымаште кок этапыштыже, Озаҥ олаште, Ленинград областьыште, икымше лийын. 2024 ийыште автомобильный спортышто S – 1600 зачётный группыштыжо ший призёрыш лектын.
Тений «Чемпион-влакын гонкышт» таҥасымаште «Ралли Дакар» таҥасымашын вич гана сеҥышыжым, «Хаас» («Формула-1») командын пилотшым эртен, но ты гана призёр радамыш логалын огыл.
– Николай элнан ик эн тале автогонщикшылан шотлалтеш. Ӱшанем, тӱнямбал кӱкшытыштан таҥасымашлаштат лиеш, – ойлен Марий Элын вуйлатышыже.
Юрий Зайцев ончыкшым эртышаш таҥасымашлаштыже участвоватлаш республикысе Правительстве полшаш тӱҥалеш, самырык спортсмен-шамычым поддержатлаш кӱлеш манын палемден.
Вашлиймаш мучаште Николай республик вуйлатышылан, Йошкар-Ола» банклан полышыжлан тауштен.
Марий Эл вуйлатышын пресс-службыжын уверже негызеш Елена Эшкинина ямдылен
