«Здравоохранений» национальный проектын «Тазалык аралтышын первичный звеножым модернизироватлымаш» регионысо проектшым илышыш пуртымо кышкарыште Советский районысо рӱдӧ больнице цифровой маммографан лийын.
Тиде 2023 ийыште республикысе медорганизацийлашке ойыраш палемдыме рентген маммографий аппарат кокла гыч икымше да пытартыш оборудований.
– Тымарте районысо ӱдырамаш-влак диспансеризаций кышкарыште маммографий шымлымашым эрташ Йошкар-Олашке але У Торъял посёлкыш кудалыштыныт, сандене тиде событий моткоч кӱлешан да куандарыше. Ынде нунын оҥыштым шкенан поликлиникыште кугу опытан, рентгенологийлан 30 утла ийым пӧлеклыше врач Виктор Геннадьевич Мезин ден тудын самырык коллегыже Аброржан Орозматов тергаш тӱҥалыт, – палемда больницын тӱҥ врачше Александр Виноградов.
– Марий Элыште онкологический чер дене черланыме структурышто шӧрту рак ӱмаште кумшо верым налын, – палдара Республиканский онкодиспансерын тӱҥ врачше Михаил Охотников. – Чӱчкыдынжӧ ӱдырамаш-влак черланат. Шӧртӱ рак деч колымо чот – нылымше верыште. Советский районышто осал пуалше чер дене 472 еҥ орлана, тышечын шӧрту рак дене – 66 ӱдырамаш. 2022 ийыште тыгай диагнозым кандаш ӱдырамашлан шындыме, кажныжын – тӱҥалтыш йыжыҥыште. Больницыш шындыме у оборудований онкологий черым лачшымак вияҥаш тӱҥалме йыжыҥыште рашемдаш полша. Тыгодым эмлыме йӧнат сай результатым пуа.
Тений первичный звеном модернизироватлыме программын кышкарыштыже Марий Эллан 15 медицине оборудованийым ойыраш да тидлан 202 миллион теҥгем кучылташ палемдыме.
М.ИВАНОВА
Фотом интернет гыч налме
