2023 ий 1 февраль гыч Россий Федерацийын Кугыжаныш Думыжо илышыш кӱлешан закон ден правил-влакым пуртен. Нуно ава капитал, самокат дене кудалме писылык, военный службо гыч колтымо граждан-шамыч деч кодшо пачер да шуко моло дене кылдалтыныт.
Ава капитал
Тудым 11,9 процентлан индексироватлыме. Тидын дене келшышын, ик йочан еш 586946,72 теҥгем налеш, кок шочшан – 775628,25 теҥгем, кокымшо икшыве шочмеш ава капиталым палемдыме огыл гын. Еш икымше йочалан ава капиталым налын гын, кокымшо йочан лиймекыже, тудлан эше 188681,53 теҥгем ешарен тӱлат.
Соцвыплате кугемеш
Еш капитал деч посна 40 утла социальный выплат ден пособий 11,9 процентлан кугемыныт. Тиде радамыш, мутлан, йоча шочмо годым ик гана тӱлыман пособий (22909,03 теҥге) ден йочам ончымо шотышто тылзе еда тӱлыман эн изи пособий (7925,71 теҥге) пурат.
«Суверенный Рунет» нерген законым пудыртымылан штраф
1 февраль гыч кыл средствын ӱшанле пашажлан йӧным ышташ йодмашым шуктыдымылан связь оператор ден кылын озаже-шамычлан 100 тӱжем теҥге марте административный штрафым пуэн кертыт. КоАП-ыш пуртымо тиде вашталтыш Российыште интернетлан ӱшанлын, тичмашын да лӱдыкшӧ деч посна пашам ышташ йӧным ыштыме нерген законын положенийже-шамычым шуктымашке виктаралтын.
Самокат, гироскутер, моноорава…
Шкетын куснылмо электрон средствым: электросамокатым, гироскутерым, монооравам – ямдылен лукшо российысе да йот элласе производитель-влаклан у Р 70514-2022 ГОСТ-ым пуртымо. Документ дене келшышын, палемдыме средствылаште эн кугу писылык шагатыште 25 километр деч кугу лийшаш огыл.
Порталыш – биометрий дене
Ынде Кугыжаныш услуго порталыште логин да пароль полшымо дене веле огыл, тыгак единый биометрический системе гочат авторизоватлалташ лиеш.
Касвеллан – куатле вашмут
1 февраль гыч Касвелын аклан туврашым шындымыж дене келшыше йот граждан ден компаний-шамычлан россий нефтьым пуаш чарыме. Тидын нерген указ 2023 ий 1 июль марте вийыште лиеш. Нефтепродукт шотышто датым Россий правительстве палемда.
«Услуго» огеш лий
3 февраль гыч Обороно министерствын, ФСБ ден СВР-ын пашашт шотышто «услуго» умылымаш кучылталтмым чарна. Документ спецслужбо-шамычын эртарыме процедурыштын, ты шотыштак кугыжаныш чекым вончымо аланыште, рашлыкшым луштара.
Сонарлыме аланыште кӧ оза?
3 февраль гыч сонарлыме нерген профильный законыш вашталтыш-влакым пуртымо. Нуно кугыжаныш сонар инспектор-шамычлан нарушенийым рашемдашлан рейд-влакым эртараш, тыгак нарушительым кучымо годым физический вий ден саргуралым кучылташ йӧным пуат.
Ярсыше илыме верым – ветеранлан
4 февраль гыч регионласе кучем-влак военный службо гыч колтымо граждан-шамыч деч ярсен кодшо да кӱлдымыш лекше илыме верым Кугу Отечественный сарын ветеранже ден инвалидше, Кугу Отечественный сарын колышо инвалидше ден участникше-влакын ешыштлан пуэн кертыт. Тылеч посна тыгай илыме вер, закон дене келшышын, радиаций аварийлаште да катастрофылаште тазалыкым локтылшо, тыгай аварийлам кораҥдыше участник-влаклан, тыгак илыме верым саемдыме шотышто тӱнен илыше инвалид ден инвалидан еш-шамычлан, боевой действий-влакын ветераныштлан ойыралтын сеҥа.
М.ИВАНОВА ямдылен
