Вес ийын Йошкар-Олаште Марий йомак тоштер почылтшаш.
Тудым ышташ «Тӱвыра поянлыкым аралаш полшышо обществын» Марий Элысе региональный организацийыже да «Чарла кремль» тӱвыра-историй комплекс темленыт. Марий Элын Тӱвыра, печать да калык-влакын пашашт шотышто министерствыжат шонымашым сайлан шотлен. Темлымаш Россий Президентын грант проект конкурсыштыжо сеҥышыш лектын.
Тоштерыште марий калык йомак да легенде-влак почеш интерактивный экспозицийым ямдылат. Тудым ончаш толшо-влак марий калыкын тӱвыраже, йӱлаже, фольклоржо дене палыме лийыт, йомак почеш ямдылыме театрализоватлыме представленийлаште участвоватлаш тӱҥалыт. Тыгак тоштерым организоватлыше-влак марий кидмастар-влакын ыштыш-кучышыштлан тунемаш полшышо мастер-класс-влакым эртараш тӱналыт. Тоштер купеч Наумовын пӧртыштыжӧ вераҥшаш.
С.Носова.
Снимкыште: купеч Наумовын пӧртшын тӱжвал сынже кызытат йомакысе гай коеш.
