«Тазалык аралтыш» нацпроект кышкарыште улшо «Онкологий чер дене кучедалмаш» регионысо проект дене келшышын, Йошкар-Оласе эмлымверыш кусаркален коштыктымо рентген аппаратым налме. Тиде аппарат полшымо дене черле еҥым эмлыме процедурым – тыглай тергымаш гыч тӱҥалын, пеш неле операций марте – кызытсе медицинын йодмыж почеш эртараш тӱҥалыт. Нацпроект почешак тений майыште ты больнице 6 миллион наре теҥгеаш видеоэндоскопийым налын. Тыгак стационарыш вераҥдаш ӱмылым пуыдымо светильник-влакым кондышаш улыт.
Тазалыкым аралыме министерствын пресс-службыжын увертарымыж почеш, проектым илышыш шыҥдараш тений 1 184,4 миллион теҥге окса ойыралтеш, тышеч 88 миллион теҥгеже федерал казна гыч пура. Республикысе онкологий диспансерыш, Республикысе клинике да Йошкар-Оласе больницылашке 12 деч шагал огыл медицине оборудованийым кондышаш улыт.
ххх
«Тазалык аралтыш» нацпроектын «Шӱм да вӱргорно чер дене кучедалмаш» регионысо проектше почеш, Марий Эл шӱм чер дене чот орланыше-влакым эмлаш федеральный субсидийым налын. Май мучашлан программе дене келшышын, 1511 льготник ты шийвундо дене пайдаланен. Черле-влаклан препаратым налаш чылаже 10 миллион теҥге наре оксам кучылтмо.
Шӱм да вӱргорно чер шарлыме да идалык мучко диспансерыште эскералтше пациент-влакын черышт деч профилактикым ышташ 2021 ийыште республикыш федерал казна гыч 69,9 миллион теҥге ойыралтын.
Л.СЕМЕНОВА
