КИДМАСТАР

Ямым пуртышо арке

Ямым пуртышо арке

Тачысе лаштыкнан унаже –  Медведево районысо Кома ялыште илыше Елена ден Виталий Ситниковмыт. Толмына годым Елена пакчаште тӱрлӧ сомылкам ыштылын. Ӱдырамаш Яшмак ялыште шочын кушкын. Ончыкылык пелашыж дене Ежово совхоз-техникумышто тунеммыж годым палыме лийыныт. Кызыт нуно кум ӱдырым ончен куштат, нунышт лачак аваштлан пакчаште полшат ыле.

Ситниковмытын пӧртышт ончылно ятыр технике шога, нунын коклаште шке гыч ыштымат коеш, санденак вигак шоналтышым: суртоза мастар кидан. Чын улмаш, пӧръеҥ техникым шкак ачала да обслуживатла.  Мландын озаже, Виталийын аваже Любовь Ильинична Ситникова 38 ий верысе школышто марий йылмым туныктен, а кызыт – сулен налме канышыште. Тудо пеленак,  изирак  пӧртыштӧ, ила, а воктенысе кугурак кермыч суртышто – эргыж ден шешкыже.

– Пӧртын проектшым шке шоненна, – ойла агроном специальностян, ландашфт дизайным палыше, кызыт верысе школышто завхозлан ыштыше Елена. –  2012 ийыште чоҥаш тӱҥалынна, а илашыже 2017 ийыште пуренна.  Суртын планировкыжым марием  шонен луктын, а мый – газонлан, корнылан проектлам. Тыгак  келшыше кушкылым налынам. Теве – клематис, тыштак розарийым ыштенам. Аркым лӱмын виноградлан ямдыленна. Кушкылым тӱрлӧ вере налына. Мутлан, шарым ушештарыше лӱмегожым Шупашкарысе «Ванюшкин сад» гыч конденна. Мемнан Йошкар-Оласе ботанический садна пеш чапле. Тушто мо гына ок куш! Родендроным, молодило кушкылым але тудым эше «каменная роза» маныт, тушечынак налме.  Пеледмышт годым могай сылне улыт! Мый шке суртыштем илаш йӧратем. Нимогай пачерат ок кӱл.

Тӱжвалне веле огыл, оралте кӧргат Ситниковмытын ойыртемалтше.  Пӧртӧнчылнӧ улшо пу меҥгым, чучым, Угарман архитектор Георгий Демкин ыштен. Тышкак таптыме ӱзгар ден  арке-шамычым шогалтым: тыге нуно – пу ден кӱртньӧ  конструкций –  «равновесий» манмыштет улыт да ямым пуртат.  – Йырышт пӱтырналтше кушкыл-влакым  шындаш шонем, – ойла озавате.

Вара пакчаштым, кудывечыштым ончен лекна. Чыла вере вате-марийын уста кидыштын паша лектышышт коеш. Ош  тыгыде шаргӱ дене  шарыме йолгорно, чатка йыраҥ-шамыч,  альпийский курык-влак… А мӧр теплицыште ынде кумшо ий кушкеш, тудын дене мемнамат сийлышт.

М.СКОБЕЛЕВ

Авторын фотожо.

Опубликовать в Одноклассники

Добавить комментарий