– Зинаида мыйын шинчашкем вик пернен. Вик йӧратен шынденам. Ӧрын-ӧрынак, вальсыш кушташ луктым. Кокымшо гана лукнем ыле – йырже самырык мотор качымарий-влак пӧрдыт. Вес ганаже почешышт уремыш лектым, йолташ ӱдыржӧ дене коктын таксим вучен шогат, мый лишемым, икмыняр почеламутемым лудым, но палыме лийын ыжна шукто – шинчын кудальыч. Йолташ ӱдыржылан тау, кушто илыме адресшым каласен шуктыш. Вара вашлияш тӱҥална. Мый Зинаида чуваш ӱдыр манын шоненам, – каласкала Владимир.
– Владимир пеш пушкыдо кумылан, шке койыш-шоктышыж дене мыйым вигак шкеж дек шупшын. Лиеш вет тыгела, тиде айдеме лач тыйынак: умыла, шижеш – мемнан коклаштат кыл тыге шочын да икте-весына деч посна иленжат огына керт.
Владимир ден Зинаида Левуковмыт ынде 14 ий утла пырля улыт. Нуно Самара областьысе Тольятти олаште илат да Волжский АвтоВАЗ заводышто пашам ыштат.
Владимир ЛЕВУКОВ Татарстан кундемын Аксубаевский районыштыжо шочын, но изинекак Чуваш мландыште кушкын. Ты районышто чуваш-влак тӱшкан-тӱшкан эн шукын илат, тыгак Нурлантский, Черемшанский районлаште шукын вожым колтеныт. Ончыкылык серызе икымше почеламутшым школышто тунеммыж годымак аважын полшымыж дене возен, а кызыт тудо – Россий писатель ушемын, Чуваш профессиональный писатель ушемын еҥже, шым книган авторжо. Ныл книгаже чуваш йылме дене, а кумытшо рушла лектыныт. Шуко жап мутланен шинчымына годым Владимир Леонтьевич аважым ятыр гана шарналтыш. Амалжат уло.
– Авам изинек Чуваш Республикын икымше калык поэтше Николай Иванович Шелеби (Н.И.Полоруссов-Шелеби) семын серызе, поэт лияш шонен. Новое Узеево ялыште нунын илыме пӧртыштат йыгырерак лийыныт. Авам кӱжгӧ тетрадьыш эре возкален улмаш. Икана саде тетрадьше мыйын кидышкем логалын. Тыгай муро, мут-влак улыт! «Тый шке возенат мо?» – йодам. «Ожно колалтын», – манеш. Шкежат ешаркален, шке шонымашыжым серкален. Рукописьшым печатлаш ямдылышым, шкемын погымо сӱан, рекрут, телым ужатыме муро-влакым ушен, 2016 ийыште «Илыш муро» книгам савыктен луктым.
– Аватше книгажым ужын шуктен?
– Да, тудо пеш куанен. Мыйын писатель йолташем-влаклан пачаш-пачаш лудын. Чаманаш логалеш, 94 ияш улмыж годым илыш дене чеверласыш.
2003 ийыште лекше «Вӱдпӧрдемыште вӱдын кышаже» лӱман икымше книгашкыже кум повесть да ойлымаш-влак пуреныт. Почеламутшо-влак «Ояр кече» (2004), «Ох, тиде илыш» (2022) сборниклаште савыкталтыныт, манмыжла, «Нуно илыш, йӧратымаш, илышын шере-кочыжо нерген улыт». Но Владимир Левуков шкенжым утларакше прозаиклан шотла, пытартыш жапыште прозын изи жанржым: очеркым, зарисовкым – ойырен налын. Теве пытартыш книгаштыже «Ох, тиде илыш» прозведенийжым повесть манын ончыктен гынат, ял илышым (Марий Турек районысо Сардаял) почын пуышо путевой очерк семын аклаш лиеш; «Полина» очерк Сардаял школын директоржо П.В.Сорокиналан пӧлеклалтын; Тольятти оласе 12-шо номеран Йоча книгагудын пашаже, чуваш калыкын чуклеме йӱлаже (У шурно пайрем), «Шанчак» чуваш фольклор ансамбль да шуко моло нергенат рушла оҥайын возымыжым уэш-пачаш лудмо шуэш: ала геройжо-влакым палет да…
Л.СЕМЕНОВА
М.СКОБЕЛЕВЫН фотожо
Тичмаш материалым 2022 ий 12 августышто лекше 58-ше№-ан газетыштына лудса.
