24-26 февральыште Марий Элыште «Шӧртньӧ Витязь» православий кинон тӱнямбал форумжын йӱксавышыже» фестиваль эртен.
Икымше кечын Э.Сапаев лӱмеш республикысе опер да балет театрыште журналист-шамычлан пресс-конференций лийын. Тушто Россий Федерацийын калык артистше, РФ Кугыжаныш Думын депутатше Николай Бурляев, Российын сулло артистше-влак Сергей Маховиков, Эвклид Кюрдзидис, театрын да кинон артистше Евгений Ткачук, руш калык муро ден романсым мурышо, «Голос. Дети» ден «Голос. Уже не дети» муро конкурслаште сеҥыше Вероника Сыромля, «Квартет ПРО» вокальный коллективын солистше Павел Лаус фестивальын могай шонымашым шыҥдарымыж нерген каласкаленыт, ятыр йодышлан вашештеныт.
– Кок ий ончыч республикыштыда лийме годым Марий Эл вуйлатыше Юрий Зайцев дене вашлийынам. Тунам ме кок программым илышыш шыҥдараш мутланен келшенна. Иктыже – Никита Сергеевич Михалковын «Двенадцать» спектакльжым Йошкар-Олашке кондаш. Спектакль ончылий тиде театрын сценыштыже ончыкталтын. Тыгак «Шӧртньӧ Витязь» православий кинон тӱнямбал форумжын йӱксавышыже» фестивальым Йошкар-Олаште эртараш шоненна. Сӧрымынам шуктенна.
1992 ий гыч «Шӧртньӧ Витязь» «Яндар чон, чон нӧлталтме верч» девиз почеш пашам ышта. Тиде шомак гына огыл, а мемнан миссийна. Форум тыгак шке чон поянлыкым, калыкын шкешотан улмыжым арален кодаш, икшыве-влак кугезе йӱлам палышт манын ышталтын, – каласен Николай Бурляев.
Пресс-конференций деч вара форумым театрын сценыштыже торжественно почыныт.
– Марий Элыште илыше-влак тиде пайремын тамжым тичмашнек шижшаш улыт. Николай Петрович Бурляевын сниматлалтме кинокартиныла гыч ончыктымо эпизодлаште патриот шӱлышым, руш калыкын чонжым шижына, айдемын тыглай огыл пӱрымашыжым ужына. Кинофестивальын девизше таче поснак кӱлешан. Калык-влакын илыш-йӱла негызыштым, чон поянлыкыштым арален кодымаш мемнам ушаш полша да калык шамнам пеҥгыдемда, – каласен Юрий Зайцев.
Фестивальыш погынышо-влаклан видео саламлымашым Российын калык артистше Владимир Машков колтен.
Фестивальын эртыме кум кече жапыште йыргешке ӱстел, ятыр творческий вашлиймаш-шамыч лийыныт, Марий Элын художникше-влакын выставкыштым почыныт, «Шӧртньӧ Витязь» кинофестивальын фильм-лауреатше-влакым ончыктеныт.
Мутлан, 25 февральыште Марий самырык театрыште Российын сулло артистше Сергей Маховиков дене поро шӱлышан вашлиймаш эртен. Лӱмлӧ артист икмыняр мурым гитар почеш муралтен, йодышлан вашештен, фотош пырля войзалтын.
Калык-влакын Келшымаш пӧртыштышт «Шӧртньӧ Витязь» XVI Славянский сӱрет сымыктыш форумын лауреатше-влакым саламленыт. Форумын президентше Николяй Бурляевын кидше гыч Чап кагазым сӱретче-влак Иван Ямбердов, Андрей Санников, Сергей Алдушкин, Валерий Чеботкин, Евгений Яранов налыныт.
Лидия Шабдарова
Снимкыште: Николай Бурляев Марий Элын сулло сӱретчыже Сергей Алдушкинлан Шӧртньӧ дипломым кучыкта.
Фотом Марий Элын Тӱвыра, печать да калык-влакын пашашт шотышто министерствын воткыл лаштыкше гыч налме.
